Qirg‘izistonni o‘z tarixida ilk bor Osiyo Kubogiga olib chiqqan murabbiy endi “Lokomotiv”ni boshqaradi

“Lokomotiv” klubi rossiyalik murabbiy Aleksandr Krestinin bilan kelishuvga erishganini ma’lum qildi.

“2019-yil Osiyo Kubogiga o‘z tarixida birinchi bor Qirg‘iziston terma jamoasini olib chiqqan ushbu mutaxassis bundan buyon “Lokomotiv” bosh murabbiyi sifatida faoliyat yuritishi kutilmoqda”, — deyiladi “temiryo‘lchilar” matbuot xizmati xabarida.

Krestinin “Bunyodkor” klubida ham bir muddat faoliyat olib borgan. 

Shuningdek, mavsum boshidan buyon jamoani boshqarib kelayotgan Yorqin Nazarov klub tizimida qolib, boshqa lavozimga tayinlanishi ham ta’kidlab o‘tildi. 

Aleksandr Krestinin va “Lokomotiv” o‘rtasidagi bitim tez orada imzolanadi.

Mutaxassis bunga qadar “Neftchi” (Qirg‘iziston), “Dordoy” (Qirg‘iziston), “Bunyodkor” (O‘zbekiston) va Qirg‘iziston terma jamoasida faoliyat olib borgan. 

“Temiryo‘lchilar” joriy mavsum Superligada ortda qolgan 10 turdan so‘ng 9 ochko bilan 12-o‘rinda bormoqda.