Janubiy Koreya hukumati mamlakat hududiga chiqindi sharlari uchirilishi ortidan Shimoliy Koreya bilan imzolangan harbiy paktni to‘xtatadi. Bu haqda Seuldagi prezident idorasi taratgan xabarga asoslanib, Reuters nashri xabar berdi.
Muhokamalarga sabab bo‘lgan hujjat “Koreya yarimorolida harbiy keskinlikni kamaytirish to‘g‘risida”gi pakt ekani aytilgan. Ushbu hujjat 2018-yilda ikki koreys mamlakati rahbarlari uchrashuvida erishilgan.
Paktga ko‘ra, ikki tomon ham demarkatsiya chizig‘i va unga yaqin 10 kilometr masofada harbiy mashqlar olib bormaslik majburiyatini olgan. Dengiz hududida ham harbiy kemalarni nazorat chizig‘iga kiritmaslikka kelishilgan.
So‘nggi haftada shimol tomonidan Seul nazoratidagi hududlarga yuzlab chiqindi sharlari uchirilishi munosabatlarni sovuqlashtirdi. Oqibat Janubiy Koreya rasmiylari har qanday harbiy kelishuvni qayta ko‘rib chiqish haqida muhokama boshlagan.
2023-yilning kuzida Shimoliy Koreya rasmiylari harbiy paktdan chiqqanini eʼlon qilgan. Shu voqeadan boshlab Pxenyan maʼmuriyati chegara yaqinidagi qo‘riqlash postlariga qo‘shin va qo‘shimcha qurollar joylashtirgani kuzatilgan.
Janubiy Koreya rasmiylari chegarada o‘rnatilgan ovoz kuchaytirgichlarni qayta ishga tushirishlarini bildirishgan. Bu propaganda vositasi bo‘lib, qo‘shni davlatdagi aholiga janub to‘g‘risida hukumatga muqobil tarzda maʼlumot uzatishni ko‘zda tutadi.
Shimoliy Koreya rasmiylari taʼkidlashicha, janubliklar muntazam ravishda shimolga oziq-ovqat, dori-darmon, pul, K-pop musiqiy albomlari va dramalari yuklangan USB to'plamlar jo‘natib turadi. Ushbu harakatdan maqsad Pxenyanning mafkurasiga zarba berish ekani aytilgan. Chiqindi sharlari uchirish ham ushbu harakatga javoban amalga oshirilgan.
Izoh (0)