Суриялик эркак 3 июнь куни Исроилнинг Руминиядаги элчихонаси яқинида портлаш содир этган. Бу ҳақда Roya News нашри хабар берди.
Манбада айтилишича, фуқаро шиша идишда қўлбола портловчи модда ҳосил қилган ҳамда уни Бухарестдаги Исроил элчихонасининг қабулхонасига кириш эшигида портлатган. Терговчилар портлатилган модда “Молотов коктейли” эканини маълум қилиб, улоқтирилувчи қўлбола портловчи аралашма эканини билдиришган.
Ҳодиса оқибатида элчихона биносига ҳеч қандай шикаст етмаган. Ҳалок бўлганлар ва яраланганлар ҳақида ҳам маълумот тақдим қилинмаган.
Руминиянинг Диги24 телеканали хабар беришича, суриялик эркак портлаш содир этган жойида зудлик билан ҳибсга олинган. Полиция уни тергов учун олиб кетган.
Расмийлар портлаш оқибатида кичик ёнғин келиб чиққани ва тезда ўчирилганини маълум қилган. Портлаш содир этган эркак ўзини ҳам ёқиб юборишга уринган.
- Маълумот ўрнида, 1 июнь куни Мексика пойтахти Мехико шаҳрида Фаластинни қўллаб намойишга чиққан 200 нафар фуқаро Исроил элчихонасига ўт қўйган эди.
- Ҳодиса оқибатида бинонинг анча қисми ёниб кетган. Намойишчиларнинг кўпчилиги полиция томонидан ҳибсга олинган.
- Жорий йилнинг апрель ойида Тошкентда ҳам Исроил элчихонаси биносига керосин тўлдирилган шиша идиш улоқтирган шахс қўлга олинган эди.
- Тергов жараёнида бу шахс Ўзбекистон давлат жаҳон тиллари университетининг 2-босқич талабаси, 20 ёшли йигит экани маълум қилинган.
- Йигит жиноят кодексининг 155-моддаси (терроризм) 1-қисмида назарда тутилган жиноятни содир этганликда айбли деб топилиб, унга нисбатан 5 йил озодликдан маҳрум қилиш жазоси тайинланган.
Изоҳ (0)