Iordaniya fuqarolari mamlakat poytaxtidagi Isroil elchixonasi qarshisida norozilik namoyishlari uyushtirdi. Bu haqda IRNA nashri xabar berdi.
Manbada aytilishicha, 1-may kuni Ammandagi Isroil elchixonasi oldida olomon to‘plangan. Namoyishchilar G‘azo va Falastin qarshilik kuchlarini qo‘llab-quvvatlab, sionist rejimning Falastin millatiga qarshi jinoyatlarini qoralagan. Tel-Aviv rejimiga qarshi shiorlar ko‘tarib chiqilgan.
Yaqin Sharq nashrlari xabar berishicha, Iordaniya aholisi Isroil rejimining G‘azo sektori mazlum xalqiga qarshi sodir etayotgan jinoyatlariga qarshi o‘z noroziligini bildirish uchun ko‘chalarga chiqib, ikki kundan beri ommaviy namoyishlar o‘tkazmoqda. Hukumat norozilik kuchaygan hududlarda mahalliy politsiya vakillarini ko‘paytirgani xabar qilingan.
Norozilik chiqishlari AQSH davlat kotibi Entoni Blinkenning Ammanga tashrifi ortidan yuzaga kelgan. Blinkenning Iordaniya qiroli Abdulla II bilan uchrashuvi boshlanganidan ko‘p o‘tmay poytaxt ko‘chalarida odamlar to‘plana boshlagan.
Nashrlar to‘plangan olomon va politsiya to‘qnashuvi haqida maʼlumot bermagan. Isroil elchixonasi oldidagi vaziyat borasida ham batafsil maʼlumot hozircha taqdim qilinmagan.
Izoh (0)