AQSH sobiq prezidenti va ayni paytda prezidentlikka faol daʼvogar Donald Tramp 2-iyun kuni TikTok ijtimoiy tarmog‘ida ro‘yxatdan o‘tgan va 1 sutkadan kamroq muddatda 4 millionga yaqin obunachiga ega bo‘lgan. Bu haqda Reuters xabar berdi.
Respublikachilar partiyasidan prezidentlikka nomzod Donald Tramp juda oz muddatda TikTok’da katta auditoriya shakllantirishga erishgan. Tahlilchilar ushbu holat uning saylov kampaniyasi uchun katta foyda olib kelishi haqida fikr bildirishgan.
AQSH prezidenti bo‘lgan paytida Tramp TikTok’ni mamlakat hududida taqiqlashning faol targ‘ibotchilaridan biri bo‘lgan. Bu platforma milliy xavfsizlikka tahdid ekanini bir necha bor taʼkidlagan.
TikTok’ka qarshi harakatning faollaridan biri, AQSHning hozirgi prezidenti Jo Bayden ham platformada saylov kampaniyasi mazmunini aks ettiruvchi videolari bilan 340 mingdan ortiq obunachi yig‘a olgan. Bugungi kunda Qo‘shma Shtatlarda TikTok platformasi foydalanuvchilari soni 170 millionni tashkil etadi.
Donald Tramp shanba kuni kechqurun @realdonaldtrump manziliga ega bo‘lgan TikTok akkauntida saylov kampaniyasi videosini joylagan. Ushbu video hozirga qadar 64 milliondan ko‘proq ko‘rilgan. Videoda Nyu Jersi shtatining Nyuark shahrida UFC musobaqalari zalida Trampning fuqarolar bilan ko‘rishgani aks etgan.
“Amerika xalqi bilan to‘g‘ridan to‘g‘ri muloqot qilish uchun barcha vositalardan foydalanaman”, — degan Donald Tramp yangi ijtimoiy tarmoqdagi akkaunti haqida fikr bildirib.
Izoh (0)