13-mart kuni AQSH Kongressining Vakillar palatasi ko‘pchilik ovoz bilan Xitoyning ByteDance kompaniyasi olti oy ichida Amerikadagi biznesini alohida kompaniyaga aylantirishi kerak bo‘lgan qonun loyihasini ma’qulladi.
Aks holda TikTok AQSHda taqiqlanishi mumkin. O‘tgan hafta Kongressga kiritilgan qonun loyihasi mualliflariga ko‘ra, Xitoy hukumati TikTok’dan amerikaliklar ma’lumotlarini to‘plash, shuningdek, Qo‘shma Shtatlardagi jamoatchilik fikriga ta’sir o‘tkazish uchun foydalanishi mumkin.
Vakillar palatasining 352 nafar a’zosi qonun loyihasini yoqlab, 65 nafari qarshi ovoz berdi. Ammo qonun loyihasi baribir Senat tomonidan ma’qullanishi kerak va kuzatuvchilar ta’kidlaganidek, ko‘plab senatorlar xorijiy kompaniyalarning faoliyatini tartibga solishning bunday usullariga qarshi.
Amerika fuqarolarining TikTok’dan foydalanishiga birinchi marta taqiq 2020-yilda o‘sha paytdagi prezident Donald Tramp tomonidan kiritilgan edi. Ma’muriyat federal taqiqni joriy etishga harakat qildi, ammo TikTok tomonidan boshlangan sud jarayonlari bunga yo‘l qo‘ymadi.
Prezident Jo Bayden saylanganidan so‘ng ushbu ilovadan davlat xizmatchilarining rasmiy qurilmalarida foydalanishni taqiqlovchi farmon chiqarildi. Shundan so‘ng AQSHning 34 shtatlari rasmiylari mahalliy amaldorlar uchun xuddi shunday taqiqlarni qabul qildi.
Montana shtatida hatto barcha shaxsiy qurilmalarga ilovani o‘rnatish taqiqlangan.
Shu bilan birga, fevral oyida Jo Baydenning saylovoldi shtabi TikTok’da akkauntini ro‘yxatdan o‘tkazganini ham ta’kidlash kerak.
Izoh (0)