AQSH prezidentligiga nomzod va sobiq davlat rahbari Donald Tramp hujjatlarni qalbakilashtirishda aybdor deb topilganidan so‘ng uning saylovoldi kampaniyasi 35 million dollarga yaqin mablag‘ yig‘di. Bu haqda The Hill nashri xabar bermoqda.
“Sud hukmi eʼlon qilinganidan bir necha daqiqa o‘tgach, bizning onlayn mablag‘ yig‘ish tizimimiz to‘lib-toshib ketdi. Trafik tufayli tarmoqdagi vaqtinchalik kechikishlarga qaramay, prezident Tramp kichik xayriya mablag‘lari hisobidan 34,8 million dollar to‘pladi”, — dedi Tramp saylovoldi tashviqoti bo‘yicha katta maslahatchilar Kris Lachivita va Syuzi Uayls.
Ularning taʼkidlashicha, bu bir kun ichida kichik xayriyalar soni bo‘yicha rekord ko‘rsatkich hisoblanadi.
Maslahatchilarning aytishicha, 5-noyabr saylov kuni “amerikaliklar haqiqiy hukmni chiqaradilar”.
- Avvalroq Nyu Yorkdagi hakamlar sudyalari Donald Trampni pornoaktrisa Stormi Danielsga sukut saqlashi uchun pul to‘laganiga oid moliyaviy maʼlumotlarni soxtalashtirganlikda aybdor deb topgandi.
- Bu AQSH tarixida birinchi marta sobiq davlat rahbarining jinoiy ish bo‘yicha sudga tortilishidir.
Izoh (0)