Surxondaryo viloyati hokimi Ulug‘bek Qosimov Muzrabot tumaniga tashrif buyurib, g‘alladan bo‘shagan yer maydonlarini ishsiz yoshlarga dehqonchilik qilish uchun ajratish tadbirida ishtirok etdi. Bu haqda viloyat hokimligi matbuot xizmati xabar berdi.
Maʼlum qilinishicha, tumanning “Dehqonobod” hududidagi “Qosimov Isoxon” fermer xo‘jaligining g‘alladan bo‘shagan 10 gektar maydoni 20 nafar otaliqqa olingan yoshlarga 50 sotixdan bo‘lib berildi. Ajratilgan yer maydoni shudgorlanib, ekin ekish uchun tayyor holatda, “Bir kontur – bir mahsulot” tamoyili asosida yetishtiriladigan mahsulot urug‘lari bilan berildi. Shuningdek, ko‘makka muhtoj, oilaviy sharoiti og‘ir bo‘lgan 20 nafar xotin-qizlarga 250 kilogramdan bug‘doy tarqatildi.
Shundan so‘ng, Rossiyaning “Leto” kompaniyasi taʼsischiligidagi “Bless S.R” MCHJ qo‘shma korxonasi tomonidan 200 gektar maydonda tashkil etilgan issiqxona, agrologistika markazi va qishloq xo‘jaligi mahsulotlarini yetishtirish faoliyati bilan tanishildi. Umumiy qiymati 35 mln dollarlik ushbu loyiha doirasida zamonaviy agrologistika markazini tashkil etish ishlari davom ettirilayotgan bo‘lib, korxonaning 200 gektar maydondagi barcha loyihalari ishga tushirilgach 350 ta ish o‘rni yaratiladi.
Karam va piyoz mahsulotlari yetishtiruvchi yirik dehqon xo‘jaliklari hamda tadbirkorlar bilan uchrashuvda Rossiya hududlari bilan erishilgan kelishuvga asosan viloyat dehqonlari tomonidan yetishtirilgan piyoz mahsulotlarini xarid qilish, eksportini tashkil etish, buning uchun viloyatning uchta hududida qabul punktlari faoliyati yo‘lga qo‘yilganligi maʼlum qilindi.
Izoh (0)