DXX Surxondaryo viloyati boshqarmasi tergov bo‘limi tomonidan “Surxondaryo suv ta’minoti” AJning mansabdor shaxslari va boshqalarga nisbatan jinoyat ishi qo‘zg‘atilgan.
Ma’lum bo‘lishicha, 2021-yilning mart oyidan 2022-yilning fevral oyiga qadar “Surxondaryo suv ta’minoti” AJ (avvalgi MCHJ) direktori lavozimida ishlagan G.B. tashkilotga qarashli ta’mirlash-tiklash unitar korxonasi rahbari R.J., fuqarolar M.A., X.B., X.Z., X.Sh., K.Z. bilan til biriktirib, jinoiy guruhga birlashgan.
Shuningdek, 2022-yilning fevral oyidan 2023-yilning avgustiga qadar “Surxondaryo suv ta’minoti” AJ direktori lavozimida ishlagan S.X. ham fuqarolar X.Z., N.A., N.A. bilan oldindan jinoiy til biriktirib, soxta ma’lumotlarni rasmiylashtirish orqali jamiyat balansidagi juda ko‘p miqdordagi temir hamda cho‘yan quvurlarni o‘zlashtirish va rastrata yo‘li bilan talon-toroj qilgan.
Tergov jarayonida davlat manfaatlariga 2 milliard 82 million so‘m miqdorida zarar yetkazilganligi aniqlanib, 1 milliard 404,5 million so‘m qismi qaytarilishi ta’minlangan.
Hozirda Tergov bo‘limi tomonidan ushbu shaxslarga nisbatan Jinoyat kodeksining 167-moddasi 3-qismi “a” bandi (o‘zlashtirish yoki rastrata yo‘li bilan juda ko‘p miqdorda talon-toroj qilish) 209-moddasi 2-qismi “a” bandi (takroran yoki xavfli retsidivist tomonidan sodir etilgan mansab soxtakorligi) bilan ayb e’lon qilinib, tergovga oid barcha hujjatlar jinoyat ishini ko‘rib chiqish uchun sudga yuborilgan.
Izoh (0)