Tahlillarga ko‘ra, 2023 yilda Buxoroda jami 1 million 387 ming nafar xorijiy sayyoh oqimi kuzatilgan. Joriy yil yanvar-aprel oylarida viloyatga xorijdan 455 ming 220 nafar sayyoh tashrif buyurgan. Viloyat iqtisodiga xorijiy sayyohlar tashrifidan 2023 yilda 339,1 million AQSH dollari tushum qayd etilgan bo‘lsa, bu ko‘rsatkich joriy yil 4 oyida 113,8 million AQSH dollari qiymatidan oshdi. Viloyatimiz sayyohlik tizimi rivojida ziyorat turizmi alohida o‘rin tutmoqda.
Ziyorat turizmi yo‘nalishida qadim va hamisha navqiron Buxoroi sharifga tashrif buyurayotgan sayyohlar soni keyingi yetti yilda qariyb 12 baravarga ko‘paygani quvonarli, albatta. Ko‘hna zaminning ziyorat turizmiga doir salohiyati Indoneziya, Malayziya, Singapur, Turkiya, Brlashgan Arab Amirliklari, Eron davlatlari, shuningdek, Mustaqil Davlatlar Hamdo‘stligidagi Rossiya Federatsiyasi, Ozarbayjon, Qozog‘iston, Qirg‘iziston, Tojikiston kabi respublikalar vakillari tomonidan e’tirof etilmoqda.
Mazkur yo‘nalishda xalqaro hamkorlikni yanada kuchaytirish, yirik kompaniya va tashkilotlar bilan muzokaralar olib borish maqsadida Buxoro viloyati hokimining turizm, madaniyat, madaniy meros va ommaviy kommunikatsiyalar masalalari bo‘yicha o‘rinbosari Botirjon Shahriyorov boshchiligadagi delegatsiya “Halal In Travel — Global Summit-2024” xalqaro anjumanida qatnashish maqsadida Singapur davlatida bo‘ldi.
Singapurning “Crescent Rating” xalqaro tashkiloti tomonidan 30 may kuni o‘tkazilgan mazkur umumjahon sammitida 30 ga yaqin davlatning 80 nafardan ko‘proq vakili qatnashdi. Xalqaro anjumanning “Musulmon ziyoratchilarni Islom merosiga qaytarish” mavzusiga bag‘ishlangan muzokarlar va taqdirlash marosimida qatnashuvchilarga O‘zbekistonda turizm, xususan, ziyorat turizmi yo‘nalishidagi muhim ijobiy o‘zgarishlar taqdimot qilindi.
Shu o‘rinda, nufuzli “Crescent Rating” tashkiloti faoliyati xususida to‘xtalib o‘tsak, unga 2008 yilda Singapurda ishbilarmon Fazal Baharddin tomonidan asos solingan bo‘lib, halol sayohatlar tadqiqotlariga bag‘ishlangan tashkilot hisoblanadi. Unda olib boriladigan tadqiqot va tahlillar natijasida har yili xalqaro reytinglar e’lon qilinadi.
Kompaniya faoliyati mazmuni sifatida turizm sohasida musulmon sayohatchilar uchun yashash sharoitlarini yaxshilash zarurligini e’tirof etadi. 2015 yilda kompaniya “Halal Trip va Muslim Travel Warehouse” kabi onlayn platformalarni joriy etish orqali xizmatlarini kengaytirgan.
2011-2014 yillarda “Crescent Rating” har yili musulmon sayohatchilar uchun turar joy darajasiga ko‘ra mamlakatlar reytingini e’lon qilib bordi. Ushbu loyiha 2015 yilda “Mastercard” bilan hamkorlik qilib, “Global musulmon sayohatlari indeksi”ga aylandi.
2013 yil avgust oyida “Crescent Rating” musulmonlarni namoz vaqtlari va shu bilan bog‘liq boshqa ma’lumotlardan xabardor qilishga mo‘ljallangan “Crescent Trips” mobil ilovasini ishga tushirdi.
2013 yil dekabr oyida “Crescent Rating” musulmon sayohatchilar uchun “Halal Trip.com” veb-saytini taqdim etdi. Unda “halol” yorlig‘iga munosib restoranlar xalqaro ma’lumotnomasi mavjud. Keyinchalik 2015 yilda “Crescent Rating” kompaniyasi “Halal Trip.som” veb sayti uchun mobil ilovani ham ishlab chiqdi. Umuman, mazkur kompaniya musulmon sayohat bozori salohiyatini 2028 yilga borib 225 milliard AQSH dollariga yetishini bashorat qilmoqda.
Sigapurda yuqori darajada tashkillashtirilgan “Halal In Travel—Global Summit-2024” umumjahon anjumaniga qaytsak, unda Buxoro viloyati hokimining o‘rinbosari Botirjon Shahriyorov asosiy ma’ruzachi sifatida ishtirok etdi.
Notiq o‘z chiqishida jumladan, mamlakatimizdagi islomiy meros inshootlariga oid batafsil ma’lumotlar bilan o‘rtoqlashib, jumladan Imom Al Buxoriy merosi, Yetti Pir turkumiga mansub muqaddas qadamjolar, Bahouddin Naqshband silsilasi va boshqalar hamda bu ziyoratgohlarning musulmon sayyohatchilari uchun ahamiyatli bo‘lgan omillari va yaratilgan qulayliklar haqida batafsil to‘xtaldi.
Islom dini, Qur’oni Karim va Hadis ilmining asl mazmun-mohiyatini, hadisshunoslik maktabining ilmiy-ma’naviy asoslarini, shu zamindan yetishib chiqqan Imom Buxoriy, Imom Termiziy singari buyuk hadisshunos allomalar merosini har tomonlama o‘rganish, ularni keng targ‘ib va tashviq qilish borasida olib borilayotgan sa’y-harakat alohida e’tirof etildi.
Shu nuqtai nazardan, O‘zbekiston hukumati tomonidan yurtimizda ziyorat turizmi salohiyatini yanada rivojlantirish va undan foydalanish samaradorligini oshirish, xorijlik sayyohlarni hududning noyob tarixiy-madaniy va me’moriy merosi bilan yaqindan tanishtirish borasidagi amaliy ishlar xususida so‘z bordi.
Qolaversa, mamlakatimizda turizm salohiyatini ziyorat yo‘nalishida yanada kengaytirish imkoniyatlari haqida “Crescent Rating & Halal Trip” tashkiloti asoschisi Fazal Baxarddin tomonidan tashkillashtirilgan “Musulmon ziyoratchilarni Islom merosiga qaytarish” mavzusiga bag‘ishlangan davra suhbatida Buxoro viloyatining turizm, jumladan, ziyorat turizmi yo‘nalishidagi yutuqlari ko‘plarning qiziqishiga sazovor bo‘ldi.
O‘z navbatida, Fazal Baxarddin tomonidan O‘zbekiston Respublikasi ziyorat turizmi bozorining turli segmentlariga yo‘naltirilgan turizm mahsuloti va xizmatlarini diversifikatsiya qilayotgani, ularning raqobatbardoshligini yanada oshirishga, maqbul va qulay ichki va xalqaro ziyorat turizmi muhitini yaratishga, turizm mahsulotlarini keng targ‘ib qilishga, shuningdek, mamlakatdagi sayohat va dam olish uchun xavfsiz manzil sifatidagi imijini mustahkamlash maqsadida olib borayotgan ijobiy ishlarini alohida ta’kidladi hamda tomonidan rasmiy taqdirlash jarayoniga start berdi.
Mazkur marosimda Buxoro shahrining umumbashariy boy Islom merosini namoyish etishga doir doimiy sa’y-harakatlari, yilning Islom merosi yo‘nalishida sayohatchi nuqtai nazaridan yuqori darajadagi Islom tarixiy madaniyatiga ega ekanligini e’tirof etilgan holda “Buxoro shahri—yilning Islom merosi manzili” nomli mukofoti va sertifikati bilan taqdirlandi.
Shu munosabat bilan umumjahon anjumanida O‘zbekiston Respublikasida turizm sohasini jadal rivojlantirishga qaratilgan islohotlar samaradorligi yuqori baholagan holda bu yilgi “Halal In Travel—Global Summit-2024” mukofoti Buxoro viloyatiga topshirildi.
Janob Fazal Baxarddin o‘z chiqishida yangilangan reytingni shakillantirishda va O‘zbekiston tomoni ushbu nufuzli mukofotga sovrindor bo‘lishiga qator omillar muhim ahamiyatga ega bo‘lganini ta’kidladi.
Bunda avvalo davlat ochiqligi, viza talablari, transport va infrastruktura qulayligi, shuningdek, kommunikatsiyalar mavjudligi, maqsadli marketing, muloqot qobiliyati, manfaatdor tomonlarning xabardorligi, qolaversa, muhit jozibadorligi, bunda xavfsizlik va tashrif buyuruvchilarga turar joy va boshqa qulayliklar yaratilgani, asosiy sayyohlik xizmatlari, noyob xalqaro tajriba va yangiliklar joriy qilinayotgani kabi jihatlarga to‘xtalib o‘tildi.
Xalqaro tashkilot asoschisi Fazal Baxarddin yuqoridagi omillarni va yurtimizda amalga oshirilayotgan izchil islohotlarni inobatga olib, xalqaro reytingda O‘zbekiston Respublikasi 2021 yilga nisbatan 7-o‘ringa ko‘tarilganini va 2022 yil uchun yangilangan reytingda umumiy 9-o‘rinni egallab, Singapur hamda Bahreyn davlatlari qatorida top, ya’ni xalqaro reytingi yuqori hisoblangan peshqadam 10 ta davlat ro‘yxatidan o‘rin olganligini mamnuniyat bilan qayd etdi.
Bundan tashqari, Singapurdagi xizmat safari va xalqaro nufuzli anjuman jarayonida Botirjon Shaxriyorov boshchiligidagi Buxoro viloyati delegatsiyasi O‘zbekiston Respublikasining Singapurdagi favqulodda va muxtor elchisi Alisher Qayumov bilan hamkorlikda bir qator xorijiy tashkilot va kompaniyalar rahbarlari bilan o‘zaro muzokaralar olib bordi.Jumladan, “Pacific Asia Travel”—Tinch Okeani Osiyo sayohatlar uyushmasi elchisi, janob Son Xva Vong, Filippin turizm departamenti kotibi muovini Myra Paz Valderossa, Islom turizm markazi bosh direktori, janob Nizran Nurdin, Janubiy-Sharqiy Osiyoda murojaatlar bilan ishlash markazi vise-prezidenti Aisha Islom, “Silk Road Fund CO.LTD”—Ipak yo‘li jamg‘armasi prezidentining kengash a’zosi Chai Xuejin, Singapur musavvirlari va tijorat uyushmasi bosh menedjeri Mehriban Esin Arslan singari o‘nga yaqin kompaniya mutasaddilari serquyosh mamlakatimizning ko‘hna va hamisha navqiron Buxoro shahri va uning bugungi sayyohlik salohiyati, mavjud imkoniyatlar haqida qiziqish bildirishdi. Samimiy va do‘stona ruhda kechgan muloqotlarda kelgusidagi o‘zaro manfaatli hamkorlikni rivojlantirishga doir hamkorlik masalalari kelishib olindi.
Izoh (0)