Surxondaryoning 3 ta tumanidagi metan zapravkalarga gaz yetkazib berish vaqtincha to‘xtatiladi

Surxondaryoning 13 ta hududini tabiiy gaz bilan taʼminlash sifati va barqarorligi yaxshilanadi, deb xabar bermoqda viloyat hokimligi matbuot xizmati.

Qayd etilishicha, viloyat aholisi va sanoat tarmoqlariga tabiiy gaz yetkazib berish uzluksizligini ta’minlash maqsadida “Sho‘rtan—Sherobod” MGQ 2-tarmog‘ida yangi qurilgan 10,9 kilometr magistral gaz quvurini 1-tarmoqqa ulash, shuningdek, “Muzrabot—Dushanbe” magistral gaz quvurining ikkita qismida mukammal ta’mirlash ishlari amalga oshiriladi.

Shu munosabat bilan 28-may kuni soat 18:00 gacha Termiz shahri hamda Termiz, Jarqo‘rg‘on, Angor, Qiziriq, Bandixon, Qumqo‘rg‘on, Sherobod, Muzrabot va Boysun tumanlaridagi barcha iste’molchilarga, shuningdek, Denov, Sho‘rchi va Oltinsoy tumanlaridagi metan zapravkalarga tabiiy gaz yetkazib berish vaqtincha to‘xtatiladi.

“Mazkur ishlar kelgusida aholi, ijtimoiy soha obyektlari hamda sanoat tarmoqlarini tabiiy gaz bilan uzluksiz taʼminlash maqsadida amalga oshirilayotganligini bildirgan holda, keltirilgan noqulayliklar uchun uzr so‘raymiz”, — deyiladi xabarda.

Tarmoqlardagi modernizatsiya ishlari yakunlangach tabiiy gaz taʼminoti qayta tiklanadi.