Сурхондарё вилояти ҳокими Улуғбек Қосимов Музработ туманига ташриф буюриб, ғалладан бўшаган ер майдонларини ишсиз ёшларга деҳқончилик қилиш учун ажратиш тадбирида иштирок этди. Бу ҳақда вилоят ҳокимлиги матбуот хизмати хабар берди.
Маълум қилинишича, туманнинг “Деҳқонобод” ҳудудидаги “Қосимов Исохон” фермер хўжалигининг ғалладан бўшаган 10 гектар майдони 20 нафар оталиққа олинган ёшларга 50 сотихдан бўлиб берилди. Ажратилган ер майдони шудгорланиб, экин экиш учун тайёр ҳолатда, “Бир контур – бир маҳсулот” тамойили асосида етиштириладиган маҳсулот уруғлари билан берилди. Шунингдек, кўмакка муҳтож, оилавий шароити оғир бўлган 20 нафар хотин-қизларга 250 килограмдан буғдой тарқатилди.
Шундан сўнг, Россиянинг “Лето” компанияси таъсисчилигидаги “Bless S.R” МЧЖ қўшма корхонаси томонидан 200 гектар майдонда ташкил этилган иссиқхона, агрологистика маркази ва қишлоқ хўжалиги маҳсулотларини етиштириш фаолияти билан танишилди. Умумий қиймати 35 млн долларлик ушбу лойиҳа доирасида замонавий агрологистика марказини ташкил этиш ишлари давом эттирилаётган бўлиб, корхонанинг 200 гектар майдондаги барча лойиҳалари ишга туширилгач 350 та иш ўрни яратилади.
Карам ва пиёз маҳсулотлари етиштирувчи йирик деҳқон хўжаликлари ҳамда тадбиркорлар билан учрашувда Россия ҳудудлари билан эришилган келишувга асосан вилоят деҳқонлари томонидан етиштирилган пиёз маҳсулотларини харид қилиш, экспортини ташкил этиш, бунинг учун вилоятнинг учта ҳудудида қабул пунктлари фаолияти йўлга қўйилганлиги маълум қилинди.
Изоҳ (0)