Meksikada mahalliy shtat rahbarligiga nomzod Xorxe Xuerta Kabrera saylovlarga ikki kun qolganda otib o‘ldirildi. Bu haqda Markaziy Amerika nashrlari xabariga asoslanib, Reuters nashri xabar berdi.
Hokimlikka nomzod Izukar de Matamoros shahrida otib o‘ldirilgan. Voqea 31-may kuni sodir bo‘lgan. Xuerta Kabrera 2-iyunga rejalashtirilgan mahalliy saylovlarga tayyorgarlik ko‘rayotgan bo‘lgan.
Xorxe Xuerta Kabrera Meksikaning markaziy Puebla shtatida mahalliy hokimiyat uchun kurashayotgan nomzod bo‘lgani xabar qilingan. Suiqasd sodir etilganda u keng aholi qatlamlari ishtirokidagi siyosiy mitingda qatnashayotgan bo‘lgan.
Hujum paytida Xorxe Xuerta Kabreraning rafiqasi va hamkasblaridan biri ham og‘ir yaralangan. O‘q ovozlaridan sarosimaga tushgan ko‘p sonli miting ishtirokchilari har tomonga tarqalishi oqibatida jarohatlanganlar ko‘p bo‘lgan.
Maʼlumotlarga qaraganda, Xorxe Xuerta Kabreraning o‘ldirilishi bilan 2024-yilgi mahalliy shtat hokimligiga saylovlarda halok bo‘lgan nomzodlar soni 37 nafarga yetgan. Bundan oldin, 2021-yilda o‘tkazilgan mahalliy saylovlarda ham 36 nomzod otib ketilgani maʼlum qilingan.
Meksika hukumati maʼlum qilishicha, saylovdagi nomzodlar va ularning yaqinlariga joriy yil boshidan beri butun mamlakat bo‘yicha jami 828 ta hujum sodir etilgan. Hujumlar asosan nomzodlarni do‘pposlash, uyiga o‘t qo‘yish tarzida kechgan.
Rasmiylar hujumlarda narkotik moddalar kontrabandasi bilan shug‘ullanuvchi noqonuniy kartellarni ayblagan. Ushbu kartellar ko‘pincha mahalliy politsiyani nazorat qilish yoki munitsipial hukumatlardan pul undirish maqsadida suiqasd urinishlarini amalga oshirishi xabar qilingan.
Izoh (0)