Франция ҳукумати 31 май куни Исроил ҳарбий саноат корхоналарига Европа миқёсида ўтказиладиган Eurosatory-2024 мудофаа кўргазмасида иштирок этишни тақиқлаган. Бу ҳақда Франция Қуролли кучлар вазирлиги хабарига асосланиб, Defence News нашри хабар берди.
Франция ҳукумати кўргазмага икки ҳафта қолганда ушбу қарорни эълон қилган. Қарорни қабул қилиш учун асос сифатида Исроилнинг Рафаҳда амалга оширган операцияси келтирилган.
“Франция расмийларининг илтимосига биноан, Исроил компаниялари Eurosatory-2024 да иштирок этмайди. Президент Макрон Исроилнинг Рафаҳдаги операцияларини тўхтатишга чақираётган бир пайтда Исроил ҳарбий корхоналарини Франция кўргазмасида кутиб олиш мантиққа тўғри келмайди”, — дейилган Франция Қуролли кучлари вазирлиги 31 май куни эълон қилган баёнотда.
Ўз навбатида, Франция президенти Эммануэль Макрон Исроилни Фаластиннинг Рафаҳ шаҳридаги амалиётларини тўхтатишга чақирган. Халқаро чақириқлар инобатга олинмаса, Тель-Авив янги чекловларга дуч келиши айтилган.
17 июнь куни Парижда очиладиган Eurosatory-2024 мудофаа кўргазмасида Исроилнинг 70 дан ортиқ компаниялари иштирок этиши режалаштирилган эди. Улар орасида мамлакатнинг учта йирик мудофаа фирмаси — Israel Aerospace Industries, Elbit Systems ва Rafael Advance Defence Systems жамиятлари ҳам бор эди.
Манбада келтирилишича, мудофаа кўргазмасида Исроилнинг Elbit Systems корхонаси ўзининг PULS ракета ташувчиси ва янги авлод Sigma гаубицасини тақдим этишни режалаштирган. Ушбу янги маҳсулотлар учун Европада харидор топиш мақсад қилинган.
Стокгольм халқаро тинчлик йўлида тадқиқот институти маълумотларига кўра, Исроил 2019—2023 йилларда дунёдаги тўққизинчи энг йирик қурол экспорт қилувчи давлат бўлган. Унинг экспорти глобал экспортнинг 2,4 фоизини ташкил этган.
Исроил Мудофаа вазирлиги маълумотларига кўра, 2022—2024 йилларда мамлакатнинг йиллик ҳарбий экспорти ҳажми 12,5 миллиард АҚШ долларини ташкил этган. Европага қурол-яроғ экспорти ҳажми эса 3,67 миллиард долларга етган.
Изоҳ (0)