“Болаларга қанчалик билим берсак, қўллаб-қувватлаб, ўзлари орзу қилган инсон қилиб етиштирсак, бу давлатга ҳам, ўзига ҳам фойда” — Танзила Норбоева

1 июнь — Халқаро болаларни ҳимоя қилиш куни муносабати билан оилавий уйларни ташкил этган оила ва ота-она қарамоғидан маҳрум бўлган болалари билан бирга Сенатга ташриф буюрди. Бу ҳақда юқори палата ахборот хизмати маълум қилди.

Сенат раиси Танзила Норбоеванинг айтишича, давлат томонидан кўрсатилаётган ҳар қандай ёрдам ва қўлловдан ҳам кўра, ҳар бир бола ҳақиқий меҳрни оилада, ўз яқин инсонларидан олади.

“Мана шу болаларга қанчалик меҳримизни берсак, қанчалик уларни саломат қилиб ўстирсак, қанчалик уларга билим берсак, қўллаб-қувватлаб, ўзлари орзу қилган инсон қилиб етиштирсак, бу давлатга ҳам фойда, боланинг ўзига ҳам фойда. Шунда бола оёққа туриб олиб, мустаҳкам бўлиб, ҳеч кимдан кам эмасман, деб ҳаётга кириб боради”, — деди Сенат раиси.

Танзила Норбоеванинг алоҳида таъкидлашича, болаларни уйига қабул қилган ота-оналар уларнинг иқтидорига қараб тўгарак ва мусобақаларга йўл қилиб беришяпти.

Кўплаб болаларни асраб олган тадбиркор Мурод Назаровнинг айтишича, ўзбек халқи ҳеч қачон болаларни ёлғиз қолдирмаган.

“Болаларга таъминотдан ташқари, меҳр керак, муҳаббат керак”, — деди тадбиркор.