Futbol bo‘yicha O‘zbekiston Superligasining 9-turidan o‘rin olgan o‘yinlar 25-may, shanba kuni bo‘lib o‘tdi.
“Nasaf” o‘z uyida duranglarni sevuvchi Samarqandning “Dinamo” klubini qabul qildi. Uchrashuvning 9-daqiqasida G‘olib G‘aybullayev qo‘pollik ishlatdi. Bosh hakam avvaliga sariq kartochka ko‘rsatdi, VAR tomon chaqirilgan hakam vaziyatni qayta ko‘rib chiqdi va kartochka qizilga almashtirildi.
10 kishi qolgan qarshiliklar 24-daqiqada jarima to‘pini amalga oshirdi. To‘pga hammadan ilg‘or harakat qilgan Mozgovoy yetib keldi va darvozaga bosh bilan zarba berib hisobni ochdi. Uchrashuvning birinchi bo‘limida hisob o‘zgarmadi.
Uchrashuvning 60-daqiqada “Dinamo” futbolchilari “Nasaf” jarima maydoniga to‘pni uzatdi. Hammadan baland sakragan Dushan Miyich hisobni tenglashtirdi.
Amaldagi chempion hisoblangan “Paxtakor” jamoasi o‘z uyida “Qizilqum”ni qabul qildi. Uchrashuvning 41-daqiqasida mehmonlar vakili Elguja Lobjanidze hisobni ochdi. Bo‘lim shu tariqa yakuniga yetdi.
Ikkinchi bo‘limning boshida hujumkorlikka zo‘r bergan poytaxt klubi Dostonbek Hamdamovning goli evaziga hisobni tenglashtirdi. Ushbu hisob o‘yin yakunigacha saqlanib qoldi va “Qizilqum” Toshkentdan 1 ochko bilan uyiga qaytdi.
Durangdan so‘ng “Paxtakor” hisobidagi ochkolar soni 12 taga yetdi. Bir o‘yin ko‘proq o‘ynagan “Qizilqum” 10 ochko to‘plagan.
Izoh (0)