AQSH Tehrondan keladigan tahdidlar ortib borishi fonida Fors ko‘rfazida havo mudofaa tizimlarini kuchaytiradi. Bu haqda Pentagon vakillarining Ar-Riyodda o‘tkazilgan muzokaralariga asoslanib, Al Jazeera nashri xabar berdi.
Manbada aytilishicha, Pentagon vakillari 22-may kuni Ko‘rfaz hamkorlik tashkiloti doirasida Saudiya Arabistoni poytaxti Ar-Riyod shahrida yig‘ilish o‘tkazgan. Yig‘ilishda tashkilotga aʼzo Fors ko‘rfazi bo‘yidagi mamlakatlar vakillari qatnashgan.
Uchrashuvda Eronning ko‘rfaz mintaqasiga va Yaqin Sharqqa tahdidi oshib borayotgani taʼkidlangan. Ushbu tahdidlar esa mintaqa mamlakatlari uchun “qiyin davrlar”ni yuzaga keltirayotgani aytilgan.
“Barchamizga maʼlumki, mintaqa so‘nggi yillarda eng qiyin davrlardan birini boshdan kechirmoqda. Eron va uning ishonchli vakillari tomonidan tahdidlar keng tarqalmoqda. Bu oktyabr oyidan beri Eron tomonidan qo‘llab-quvvatlangan misli ko‘rilmagan hujumlar ko‘rinishida namoyon bo‘lmoqda”, — deya bayonot bergan Ar-Riyoddagi Pentagon delegatsiyasining ismi eʼlon qilinmagan vakili.
Manbada aytilishicha, uchrashuvlarning asosiy maqsadlari integratsiyalashgan havo mudofaasi va raketaga qarshi mudofaa bo‘yicha hamkorlikni kuchaytirish yo‘llarini ko‘rib chiqish, jumladan, raketalarga qarshi erta ogohlantiruv maʼlumotlarini almashishni ko‘paytirishdan iborat.
AQSh delegatsiyasiga Pentagonning Yaqin Sharq bo‘yicha yuqori lavozimli rasmiysi Den Shapiro boshchilik qilayotgani aytilgan. Delegatsiya kun dasturida Eron tomonidan qo‘llab-quvvatlanishi daʼvo qilinuvchi “Hizbulloh” va “Ansorulloh” tashkilotlariga qarshi amaliy harakatlar uyushtirish haqida ham so‘z borgan.
Uchrashuvlarning to‘liq tafsiloti hozircha maʼlum qilinmagan. Bir qator tahlilchilar Fors ko‘rfazi bo‘yida havo mudofaa tizimlari kuchaytirilishi mumkinligi haqida fikr bildirgan.
Izoh (0)