АҚШ Теҳрондан келадиган таҳдидлар ортиб бориши фонида Форс кўрфазида ҳаво мудофаа тизимларини кучайтиради. Бу ҳақда Пентагон вакилларининг Ар-Риёдда ўтказилган музокараларига асосланиб, Al Jazeera нашри хабар берди.
Манбада айтилишича, Пентагон вакиллари 22 май куни Кўрфаз ҳамкорлик ташкилоти доирасида Саудия Арабистони пойтахти Ар-Риёд шаҳрида йиғилиш ўтказган. Йиғилишда ташкилотга аъзо Форс кўрфази бўйидаги мамлакатлар вакиллари қатнашган.
Учрашувда Эроннинг кўрфаз минтақасига ва Яқин Шарққа таҳдиди ошиб бораётгани таъкидланган. Ушбу таҳдидлар эса минтақа мамлакатлари учун “қийин даврлар”ни юзага келтираётгани айтилган.
“Барчамизга маълумки, минтақа сўнгги йилларда энг қийин даврлардан бирини бошдан кечирмоқда. Эрон ва унинг ишончли вакиллари томонидан таҳдидлар кенг тарқалмоқда. Бу октябрь ойидан бери Эрон томонидан қўллаб-қувватланган мисли кўрилмаган ҳужумлар кўринишида намоён бўлмоқда”, — дея баёнот берган Ар-Риёддаги Пентагон делегациясининг исми эълон қилинмаган вакили.
Манбада айтилишича, учрашувларнинг асосий мақсадлари интеграциялашган ҳаво мудофааси ва ракетага қарши мудофаа бўйича ҳамкорликни кучайтириш йўлларини кўриб чиқиш, жумладан, ракеталарга қарши эрта огоҳлантирув маълумотларини алмашишни кўпайтиришдан иборат.
АҚШ делегациясига Пентагоннинг Яқин Шарқ бўйича юқори лавозимли расмийси Ден Шапиро бошчилик қилаётгани айтилган. Делегация кун дастурида Эрон томонидан қўллаб-қувватланиши даъво қилинувчи “Ҳизбуллоҳ” ва “Ансоруллоҳ” ташкилотларига қарши амалий ҳаракатлар уюштириш ҳақида ҳам сўз борган.
Учрашувларнинг тўлиқ тафсилоти ҳозирча маълум қилинмаган. Бир қатор таҳлилчилар Форс кўрфази бўйида ҳаво мудофаа тизимлари кучайтирилиши мумкинлиги ҳақида фикр билдирган.
Изоҳ (0)