Isroil havo kuchlari 22-may kuni G‘azo shahriga hujum uyushtirishi oqibatida kamida 7 nafar falastinlik halok bo‘lgan. Bu haqda Al Jazeera nashri xabar berdi.
Falastinning WAFA agentligi 7 kishi halok bo‘lgani haqidagi xabarni tasdiqlagan. Hujum asosan G‘azo shahri markazidagi aholi to‘planish nuqtalariga qaratilgani bildirilgan.
Hujum sodir bo‘lgan Zeytun mahallasida qidiruv-qutqaruv ishlar davom etayotgani bildirilgan. Hujumlar takrorlanishi ehtimoli sabab aholidan xavfsizlik choralarini ko‘rish so‘ralgan.
G‘azo sog‘liqni saqlash vazirligi Isroil hujumida yaralanganlar soni 20 nafar ekanini bildirgan. Shaharda tibbiyot tizimi izdan chiqqani bois yaralanganlarga dala shifoxonalarida yordam ko‘rsatilayotgani bildirilgan.
WAFA agentligi xabar berishicha, Isroil harbiy samolyotlari dastlab yoqilg‘i quyish shoxobchasi oldida to‘plangan olomonga hujum uyushtirgan. Keyinroq esa shahar markazidagi binolar nishonga olingan.
Sog‘liqni saqlash vazirligi qurbonlar orasida bolalar ham borligini bildirgan. Jarohatlanganlar orasida og‘ir darajada shikastlanganlar borligi bois qurbonlar soni oshishi mumkinligi bildirilgan.
Izoh (0)