Meksika janubi-sharqida jazirama issiq tufayli 146 ta maymun nobud bo‘ldi. Bu haqda Markaziy Amerika manbalariga tayanib, Anadolu nashri xabar berdi.
Meksikada jazirama oqibatida maymunlar o‘limi bilan bog‘liq holat may oyi boshidan kuzatila boshlangan. O‘lim holatlari asosan yo‘qolib ketish xavfi ostida turgan Saraguatos maymunlari ichida kuzatilgan.
Holat asosan Tabasko va Chiapas shtatlarida yuz bergan. Ekologlar va mahalliy aholi vakillari primatlar turining yuqori harorat va suvsizlanish tufayli daraxtlardan yiqilib o‘layotganini xabar qilgan.
Atrof-muhitni muhofaza qilish vazirligi 20-may kuni 80 ta maymunning o‘limi bo‘yicha tekshiruvlar o‘tkazilishini maʼlum qilgan. Biroq shu kungacha hech bir hukumat organi o‘lgan maymunlar soni haqida rasmiy maʼlumot taqdim etmagan.
Tabasko shtatida tug‘ilgan Meksika prezident Andres Manuel Lopez Obrador ichki ishlar sekretariga halok bo‘layotgan turni saqlab qolish bo‘yicha choralar ko‘rishni buyurgan.
Meksika 2024-yil boshidan beri ketma-ket uchinchi issiq havo to‘lqinini boshdan kechirmoqda. Mamlakatning Tabasko va Chiapas kabi shtatlarida harorat Selsiy shkalasi bo‘yicha 45 gradusdan oshgani xabar qilingan.
- Hozirga qadar Meksikada 26 fuqaro yuqori haroratdan vafot etgani xabar qilingan.
- Hukumat aholidan zarurat bo‘lmasa, ko‘chada yurmaslikni so‘ragan.
Izoh (0)