Buyuk Britaniyada parlament saylovlari sanasi 4-iyulga belgilangan. Bu haqda Britaniya bosh vaziri Rishi Sunak hukumat yig‘ilishi yakunlari bo‘yicha bayonot berdi.
“Hozir Buyuk Britaniya uchun kelajagini tanlash vaqti keldi — erishilgan yutuqlarga kifoyalanamizmi yoki hech qanday reja va aniqliksiz hammasini boshidan boshlaymizmi, aniqlab olishimiz kerak. Bugun erta tongda qirol hazratlari bilan suhbatda men parlamentni tarqatib yuborishni so‘radim. Qirol bu iltimosni qondirdi va bizda 4-iyulda umumiy saylov o‘tkaziladi”, — dedi Sunak.
Rishi Sunakning qayd etishicha, Buyuk Britaniya saylovlari “dunyoda sovuq urush tugaganidan beri eng xavfli” bir vaqtda bo‘lib o‘tadi. Uning so‘zlariga ko‘ra, global xavfsizlik va barqarorlikka tahdid Ukrainadagi janglar va Yaqin Sharqda ekstremizmning kuchayishi bilan bog‘liq.
“Umid qilamanki, bosh vazir bo‘lganimdan keyingi faoliyatim bizning rejalarimiz borligini va mamlakatimizni gullab-yashnashi uchun zarur bo‘lgan dadil harakatga tayyor ekanimizni ko‘rsatadi. Men ushbu rejaga sodiqman va hatto qiyin bo‘lgan taqdirda ham siz bilan doimo ochiq bo‘lib kelganman, chunki men oson bo‘lgan narsa emas, balki mamlakatimiz uchun to‘g‘ri bo‘lgan narsaga amal qilaman”, deb qo‘shimcha qildi Rishi Sunak.
Sky News suhbatlashgan ekspertlarning fikricha, Rishi Sunak Buyuk Britaniyadagi iqtisodiy vaziyat yaxshilangani sababli saylovlarni muddatidan oldin o‘tkazishga qaror qilgan. 2024-yil aprel oyi oxirida Buyuk Britaniyada inflyatsiya mart oyidagi 3,2 foizdan 2,3 foizgacha pasaydi, deya qayd etadi Sky News. Buyuk Britaniya iqtisodiyoti 2024-yilning birinchi choragida oldingi uch oyga nisbatan 0,6 foizga o‘sdi. Mutaxassislarning ta’kidlashicha, bu natijalarning barchasi Sunak joriy yilda erishmoqchi bo‘lgan ko‘rsatkichlarga mos keladi.
Izoh (0)