Ўзбекистонда 2024 йил 1 июндан бошлаб “маҳалла еттилиги” вакиллари томонидан ягона саволнома асосида фуқароларнинг ижтимоий-иқтисодий муаммоларини аниқлаш ва бартараф этиши тизими жорий этилади. Бу ҳақда Вазирлар Маҳкамасининг “Маҳаллаларда аҳоли муаммоларини аниқлаш тизимини такомиллаштириш тўғрисида”ги қарори лойиҳасида эълон қилинди.
Унда айтилишича, фуқароларни бирламчи ўрганиш жараёнида фақат ягона саволномадан фойдаланилади. Ягона саволнома асосида аниқланган бирламчи муаммоларни “маҳалла еттилиги” вакиллари ўзларининг идоравий саволномасидан фойдаланиб, атрофлича ўрганиш ишларини ташкил қилинади.
Ушбу саволнома асосида фуқароларнинг аниқланган муаммолари “маҳалла еттилиги” вакилларининг электрон платформаларига аҳоли билан индивидуал тартибда ишлаш учун буюртма сифатида шакллантирилади. Бунда, буюртмани “маҳалла еттилиги” вакиллари томонидан кўриб чиқилиши мажбурий ҳисобланади.
Фуқароларнинг ягона саволнома асосида аниқланган ҳамда “маҳалла еттилиги” вакилларига ҳал этиш учун йўналтирилган муаммоларини кўриб чиқиш ва натижалари 10 кун ичида электрон ахборот тизимига киритилади.
Қуйидаги ҳолатларда ягона саволномадан фойдаланиб, фуқароларнинг муаммоларини ўрганиш ва уларга ижтимоий-иқтисодий ёрдам (хизмат) кўрсатиш ишлари ташкил қилинади:
- фуқаронинг мурожаати асосида;
- уйма-уй юриш орқали;
- бошқа фуқаролар томонидан шахснинг ижтимоий-иқтисодий ёрдам (хизмат)га муҳтожлиги тўғрисида хабар берилганда;
Маҳалла раиси ягона саволнома асосида аниқланган ҳамда масъул ташкилотларга йўналтирилган муаммоларнинг ўз вақтида кўриб чиқилиши ва ижобий ҳал этилиши учун масъул ҳисобланади.
Қайд этилишича, бу тартибнинг йўлга қўйилиши фуқароларнинг муаммоларини аниқлашнинг ягона тизими яратилиб, рақамлаштирилишига, муаммолар ҳал этилишида “маҳалла еттилиги” вакиллари ва бошқа масъул вазирлик ва идораларнинг масъулияти оширилишига хизмат қилади.
Изоҳ (0)