Saudiya Arabistonining Ar-Riyod shahrida 18-may kuni boks kechasi tashkil etildi.
Kechaning asosiy jangi og‘ir vaznda mutlaq jahon chempioni unvoni uchun britaniyalik Tayson Fyuri va ukrainalik Oleksandr Usik o‘rtasida bo‘lib o‘tdi.
Usik janggacha WBA, IBF, WBO va IBO yo‘nalishlari kamariga egalik qilayotgan edi. Fyuri esa 2020-yil fevralida Deontey Uaylderni mag‘lub etib, WBC chempioniga aylangan edi.
Jangda hakamlar qaroriga binoan Oleksandr Usik ochkolar hisobida g‘alaba qozondi: 115 — 112, 113 — 114, 114 — 113.
Ushbu jangdan so‘ng Oleksandr Usik og‘ir vazn toifasida mutlaq chempionga aylandi. Oxirgi 25 yildan so‘ng ilk marta og‘ir vaznda mutlaq jahon chempioni aniqlandi. Oxirgi marta Lennoks Lyuis 1999-yili Evander Holifildni mag‘lub etib, mutlaq chempion bo‘lgandi.
To‘rtta kamar davrida Usik barcha vazn toifasidagi 12-mutlaq chempiondir. Bunga qadar boshqa divizionlarda Bernard Hopkins, Jermeyn Teylor, Terens Krouford, Josh Teylor, Saul Alvares, Jermell Charlo, Devin Heyni, Naoya Inoue kabi bokschilar mutlaq jahon chempioniga aylangan.
Izoh (0)