Hasanboy Do‘stmatov derbida g‘alaba qozondi, Abdumalik Halokov va Ruslan Abdullayev ham oltin medalga ega chiqdi

Rossiyaning Xabarovsk shahri mezbonlik qilayotgan boks bo‘yicha “Konstantin Korotkov xotira turniri”da bugun, 18-may kuni final janglari bo‘lib o‘tadi. Kun davomida 16 nafar o‘zbekistonlik bokschi oltin medal uchun ringga ko‘tariladi.

Final doirasida o‘zbekistonlik bokschilar o‘rtasida ikki derbi bo‘lib o‘tishi rejalashtirilgan. Unda erkaklar o‘rtasidagi -54 kg vazn toifasida Hasanboy Do‘stmatov va Shahzod Muzaffarov, +92 kg vaznda esa Bahodir Jalolov hamda Lazizbek Mullojonov oltin medal uchun ringga ko‘tariladi.

Hozirgina derbining birinchisi yakuniga yetdi va unda Hasanboy Do‘stmatov ochkolar hisobida g‘alaba qozondi. Hakamlarning ikki vakili uchrashuvda durang qayd etilganini qayd etgan bo‘lsa, ikki hakam Hasanboyning bir hakam esa Shahzodning g‘alabasini qayd etdi.

O‘zbekistonlik Abdumalik Xalokov ham final jangini o‘tkazdi. Raqibiga hech qanday imkoniyat qoldirmagan Abdumalik belaruslik Pankov ustidan 5-0 hisobida g‘alaba qozondi. 

67 kilogrammgacha bo‘lgan vazn toifasida Ruslan Abdullayev yana bir rossiyalik bokschiga qarshi jang qildi. Ruslan jangning birinchi raundidayoq raqibini uch bora nokdaun holatiga tushirdi va hakam jangni to‘xtatishga majbur bo‘ldi. Shu tariqa Abdullayev o‘zbekiston hisobiga yana bir oltin medalni olib keldi. 

Final uchrashuvlari bugun yakuniga yetadi.