Саудия Арабистонининг Ар-Риёд шаҳрида 18 май куни бокс кечаси ташкил этилди.
Кечанинг асосий жанги оғир вазнда мутлақ жаҳон чемпиони унвони учун британиялик Тайсон Фьюри ва украиналик Олександр Усик ўртасида бўлиб ўтди.
Усик жанггача WBA, IBF, WBO ва IBO йўналишлари камарига эгалик қилаётган эди. Фьюри эса 2020 йил февралида Деонтей Уайлдерни мағлуб этиб, WBC чемпионига айланган эди.
Жангда ҳакамлар қарорига биноан Олександр Усик очколар ҳисобида ғалаба қозонди: 115 — 112, 113 — 114, 114 — 113.
Ушбу жангдан сўнг Олександр Усик оғир вазн тоифасида мутлақ чемпионга айланди. Охирги 25 йилдан сўнг илк марта оғир вазнда мутлақ жаҳон чемпиони аниқланди. Охирги марта Леннокс Льюис 1999 йили Эвандер Ҳолифилдни мағлуб этиб, мутлақ чемпион бўлганди.
Тўртта камар даврида Усик барча вазн тоифасидаги 12-мутлақ чемпиондир. Бунга қадар бошқа дивизионларда Бернард Ҳопкинс, Жермейн Тейлор, Теренс Кроуфорд, Жош Тейлор, Сауль Алварес, Жермелл Чарло, Девин Ҳейни, Наоя Иноуэ каби боксчилар мутлақ жаҳон чемпионига айланган.
Изоҳ (0)