Oleksandr Usik “asr jangi”da Fyuri ustidan g‘alaba qozondi va og‘ir vaznda mutlaq chempion nomini qo‘lga kiritdi

Saudiya Arabistonining Ar-Riyod shahrida 18-may kuni boks kechasi tashkil etildi.

Kechaning asosiy jangi og‘ir vaznda mutlaq jahon chempioni unvoni uchun britaniyalik Tayson Fyuri va ukrainalik Oleksandr Usik o‘rtasida bo‘lib o‘tdi.

Dastlabki uch raundda ukrainalik bokschi katta ustunlikka ega bo‘ldi. To‘rtinchi raundda Tayson Fyuri ham sekin hujumga o‘tib, aniq zarbalar berishga harakat qildi. Beshinchi raundda Usik chekina boshladi va Tayson Fyuri vaziyatdan foydalanib hujumga o‘ta boshladi. Oltinchi raundda ham Tayson Fyuri ustunlikni saqlab qoldi va ukrainalik bokschiga aniq zarbalar berdi. 

Jangning 7-raundiga kelib Usik ham hujumga o‘ta boshladi, ammo buning oqibatida o‘zi ham zarbalar qabul qilib oldi. 8-raundda Tayson Fyuri ko‘plab zarbalar qabul qilib oldi. Uning “hurmacha” qiliqlari kamaydi. 9-raundga kelib Usik o‘z vaqtini to‘liq hujumda o‘tkazdi. Aniq zarbalardan keyin Tayson Fyuri nokdaun holatiga tushib qoldi. Fyurini faqatgina raund tugagani haqidagi bong qutqarib qoldi. 

10- raundni Tayson Fyuri o‘ziga kelib olish uchun sarfladi. Oleksandr ham jiddiy hujumga o‘tmadi. 11-raundda bokschilar o‘z stilida jang qildi. Usik ko‘proq hujumga o‘tdi, Tayson Fyuri esa raqibini kutib oldi. So‘nggi raundda ham ukrainalik bokschi tinmasdan hujumga o‘tib, raqibiga aniq zarbalar berdi. Bokschilar shu tariqa jangni yakunladi. 

Jangdan so‘ng bokschilar bir biriga hurmat bajo keltirdi.

Ushbu jangda hakamlar qaroriga binoan Oleksandr Usik ochkolar hisobida g‘alaba qozondi: 115 — 112, 113 — 114, 114 — 113.

Usik janggacha WBA, IBF, WBO va IBO yo‘nalishlari kamariga egalik qilayotgan edi. Fyuri esa 2020-yil fevralida Deontey Uaylderni mag‘lub etib, WBC chempioniga aylangan edi. 

Ushbu jangdan so‘ng Oleksandr Usik barcha 5 kamarga egalik qilish bilan bir qatorda, mutlaq chempionga aylandi.

Oxirgi marta Lennoks Lyuis 1999-yili og‘ir vazn toifasida mutlaq chempion bo‘lgan edi. 

Tayson Fyuri va Oleksandr Usik ishtirok etgan boks oqshomining boshqa natijalari bilan tanishing: 

• Jay Opetaya (24-0) Mairis Briedis (28-2) ustidan ochkolar hisobida g‘alaba qozondi.
• Entoni Kakache (21-1) Jo Kordina (17-0)ni nokautga uchratdi;
• Sergey Kovalyov (35-5-1) Robin Safarga (15-0) hakamlarning yakdil qarori bilan yutqazdi;
• Mark Chemberlen (15-0) Joshua Oluvasen Vahabni (23-1) birinchi raunddayoq nokautga uchratdi;
• Agit Kabayel (25-0) Frank Sanches (24-0)ni yettinchi raundda nokautga uchratdi;
• Daniel Lapin (10:0) Oktavio Pudivitrani (9:2) birinchi raunddayoq nokautga uchratdi.