Oliy Majlisning Inson huquqlari bo‘yicha vakili (ombudsman) Sirdaryo viloyatidagi muruvvat uyida yashovchi ruhiy nosog‘lom ayol mazax qilingani holati yuzasidan ma’lumot berdi.
Aniqlanishicha, ayolni mazax qilgan xodimalar ushbu muassasaga autsorsing asosida xizmat ko‘rsatadigan tadbirkorlik subyektida ishlagan. Ular muassasa hududida erkin sayr qilib yurgan Y.S.ni shifokor, hamshira va kichik tibbiy xodimlar (enaga) ruxsatisiz oshxona binosiga olib kirib, ruhiy holatini bila turib mazax qilishgan. Mazkur olingan videotasvir oshxonada ishlovchi xodimlarning Telegram guruhiga tashlagan.
Y.S.da aqli zaiflikning og‘ir darajasi sababli xulq-atvor buzilishi bilan kechuvchi ruhiy holat tez-tez kuzatiladi (yaʼni doimiy ravishda yaqin qarindoshlarini eslab, uyimga jo‘nating yoki chaqirib bering, deb yig‘lash holatlari yuzaga keladi).
17-may kuni Sirdaryo “Muruvvat” nogironligi bo‘lgan shaxslar uchun ayollar internat uyi rahbari Sirdaryo tumani Ichki ishlar bo‘limiga murojaat qilib, X.M. va SH.O.ning xatti-harakatiga “Nogironligi bo‘lgan shaxslarning huquqlari to‘g‘risida”gi qonunning 3 va 4-moddalari yuzasidan qonuniy chora ko‘rish bo‘yicha murojaat qilgan.
Maʼlum qilinishicha, xodimalar bilan tuzilgan mehnat shartnomasi bekor qilingan va ular vazifasidan ozod etilgan. Hozirgi kunda Sirdaryo tumani IIB tomonidan holat yuzasidan surishtiruv ishlari olib borilmoqda.
Ombudsman mintaqaviy vakili Y.S. va uning shifokori bilan suhbatlashganda kayfiyati va ruhiy holati yaxshi ekani maʼlum bo‘lgan.
Izoh (0)