Samarqandda Coca-Cola ichimligining navbatdagi zavodi ochildi

2024-yil 15-may kuni Samarqand viloyati Jomboy tumanida Coca-Cola ichimligi zavodining tantanali ochilish marosimi bo‘lib o‘tdi.

Tadbirda kompaniya rahbarlari, vazirlik va idoralar vakillari, tadbirkorlar ishtirok etdi.

Marosimda Anadolu group bosh direktori Burak Basharir nutq so‘zlab, yangi zavodning ishga turilishi muhim voqealardan ekanini aytdi.  

“O‘zbekistonda Coca-Colaning to‘rtinchi zavodini ochayotganimiz mamlakat halqi, hukumati va biznes muhitiga bo‘lgan kuchli ishonchimiz ifodasidir. Hozirgacha respublikada ichimlik ishlab chiqarish uchun 500 million dollardan ziyod sarmoya kiritdik. Shundan 112 million dollari Samarqandda ochilgan yangi zavodimizga qilingan sarmoyadir. Bu korxonada 300 ta ish o‘rni yaratyapmiz. Ichimlik ishlab chiqarishda 80 foiz mahsulot mahalliy bozordan xarid qilinadi”, — dedi Burak Basharir.

Tantanada mehmonlarga yangi zavod haqida maʼlumot berildi. Aytilishicha, korxonaning umumiy hududi 18,5 gektarni tashkil qiladi. Yiliga 280 million litr ichimlik ishlab chiqariladi.

Tadbirda Samarqand viloyati hokimi Erkinjon Turdimov yangi zavod ochilishi bilan barchani qutladi.

“Bugun Jomboy tumanida tarixiy kun, katta tantana. Bu yerda dunyo tan olgan brend Coca-Cola ichimligining yangi ishlab chiqarish korxonasi o‘z faoliyati boshlamoqda. Tan olib aytish kerakki, hozirda o‘zbekistonliklarning Coca-Cola ichimligiga bo‘lgan talabi juda yuqori”, — dedi viloyat rahbari.

Shu bilan birga, Investitsiyalar, sanoat va savdo vaziri Laziz Qudratov ham barchani tabriklab, hukumat investorlarga sharoit yaratishga doim tayyorligini aytdi.

“O‘zbekistonda xususiy sektorda investorlarga katta imkoniyatlar berilmoqda. Bugungi voqea ham so‘zimning isbotidir. Hukumat investorlar bilan yaqin hamkor bo‘lishga doim intilib kelgan. Mamlakatda biznesni rivojlantirish juda ham zarur. Bu yangi ish o‘rinlari, daromadlar va aholi farovonligini oshirishda muhim ahamiyatga ega. Biz investorlarga qulay sharoitlar yaratishda davom etamiz”, — dedi vazir.

Anadolu group 20 ta davlatda faoliyat yuritayotgan 80 ta kompaniyaga egalik qiladi. Xususan, Coca-Cola company brendi bilan hamkorlikda qator mamlakatlarda zavodlar faoliyatini olib boradi.

Toshkent, Namangan, Urganch shaharlaridagi Coca-Cola ichimligi zavodlari ham shular jumlasidan. 

Samarqanddagi tantanali ochilish marosimidan so‘ng mehmonlar yangi zavod uskunalari bilan tanishtirildi.

Reklama huquqi asosida.