Ijtimoiy tarmoqlarda Sirdaryo, Yallama va Najimov chegara bojxona postlarining O‘zbekiston bilan chegaradosh tomonida tirbandliklar mavjudligi yuzasidan xabarlar tarqalgandi. Bojxona qo‘mitasi holatga izoh berdi.
Qayd etilishicha, so‘nggi yillarda mamlakat iqtisodiyoti va tashqi savdo aylanmasi tobora kengayib, chegara-o‘tkazish punktlari orqali yuk avtotransport vositalarining harakati ham keskin ortib bormoqda. Shu bilan birga, chegara bojxona postlarining o‘tkazish imkoniyatini oshirish hamda fuqarolar, tadbirkor va yuk tashuvchilarga qulayliklar yaratish maqsadida O‘zbekiston-Qozog‘iston davlat chegarasidagi o‘tkazish punktlarida qurilish va rekonstruksiya ishlari amalga oshirilmoqda.
Bugungi kunda Sirdaryo chegara bojxona postida xodimlar kun-u tun xizmat olib bormoqda va bojxona posti orqali 1 kunda o‘rta hisobda 350–400 ta yuk avtotransport vositasi harakatlanmoqda. Sirdaryo chegara bojxona posti orqali Qozog‘istonga chiqish yo‘nalishida harakatlangan yuk avtotransport vositalari tahlil qilinganda, 17-may kuni jami 82 tonna gilos mevalari yuklangan 4 ta yuk avtotransport vositalari, 18-may kuni soat 15:00 gacha jami 45 tonna gilos mevasi ortilgan 2 ta va 21 tonna o‘rik mevasi ortilgan 1 ta yuk avtotransport vositalari harakatlangani maʼlum bo‘ldi.
Shuningdek, viloyatga yaqin hududlardan ortilgan qishloq xo‘jaligi mahsulotlari 1 sutkaga qolmasdan chegaradan chiqib ketmoqda. Jumladan, Toshkent viloyati bojxona boshqarmasining Yangiyo‘l TIF bojxona posti tomonidan 17-may kuni soat 20:31 da rasmiylashtirilgan 22,6 tonna gilos mahsuloti yuklangan yuk avtotransport vositasi 18-may kuni soat 14:10 da Sirdaryo chegara bojxona posti orqali rasmiylashtirilgan holda Qozog‘iston davlatiga chiqib ketgan.
Bundan tashqari, 18-may kuni soat 16:00 holatiga Sirdaryo chegara bojxona postida Qozog‘istonga chiqish yo‘nalishida jami 113 ta eksportga qishloq xo‘jaligi mahsulotlari ortilgan yuk avtotransport vositalari, shundan 3 ta o‘rik va 2 ta gilos mevalari ortilgan yuk avtotransport vositalari navbatda turibdi.
Toshkent viloyati bojxona boshqarmasi tasarrufidagi Yallama chegara bojxona posti orqali 1 kunda o‘rta hisobda 900–1000 ta, Najimov chegara bojxona posti orqali 300–400 ta yuk avtotransport vositasi harakatlanmoqda.
18-may kuni soat 16:00 holatiga Yallama chegara bojxona postida Qozog‘istonga chiqish yo‘nalishida 12 ta qishloq xo‘jaligi mahsulotlari, Najimov chegara bojxona postida 30 ta qishloq xo‘jaligi mahsulotlari yuklangan avtotransport vositalari eksportga rasmiylashtirilib, chiqish uchun navbatda turibdi.
Bojxona qo‘mitasi tomonidan qishloq xo‘jaligi mahsulotlarini chegara bojxona postlarida navbatsiz rasmiylashtirish yo‘lga qo‘yilgan.
“Shuningdek, chegaradagi muammolar va tirbandliklarni tezkorlik bilan hal etish maqsadida Bojxona qo‘mitasi tomonidan Telegram’da maxsus guruh ochilganini maʼlum qilamiz hamda ushbu guruhda onlayn ravishda qaysi postda qancha avtotransport vositalari navbatda turgani yuzasidan maʼlumotlar berib boriladi. Sizlardan ushbu maʼlumotlarga asosan ish ko‘rishni tavsiya qilamiz”, — deyiladi xabarda.
Izoh (0)