Toshkentda o‘zini “omadsiz” deb atab, ko‘prik ustidan sakramoqchi bo‘lgan yigit jarimaga tortildi (video)

Toshkent shahar Chilonzor tumanidagi ko‘prikdan o‘zini tashlamoqchi bo‘lgan yigit ishi bo‘yicha ma’lumot berildi.

Ijtimoiy tarmoqlarda bir yigit ko‘prikka chiqib, u yerga marker yordamida Loser, yaʼni “omadsiz” deb yozib, 5 metr balandlikdan o‘zini tashlamoqchi bo‘lgani tasvirlangan video tarqaldi.

“Millar” informatsion dasturida ma’lum qilishicha, mazkur voqeadan xabar topgan post-patrul xizmati xodimi darhol voqea joyiga yetib borgan va yigit bilan suhbatlashgan.

Nima sababdan bu yerga chiqib olganini so‘ragan vaqtimda, fuqaro “jonimdan to‘ydim”, deb aytdi. Fuqaroning qo‘liga qarasam qo‘lida ham “jonimdan to‘ydim”, degan yozuv bor ekan, — deydi ichki ishlar xodimi.

Shundan so‘ng, boshqa IIO xodimlari ham ham yordamga yetib kelib, fuqaro pastga olib tushilgan.

Jinoyat ishlari bo‘yicha Chilonzor tumani sudi qarori bilan ushbu fuqaro Ma’muriy javobgarlik to‘g‘risidagi kodeksning 183-moddasi (mayda bezorilik) bilan ayblanib, unga BHMning 3 baravari (1 million 20 ming so‘m) miqdorida jarima jazosi tayinlangan.

Bundan oldin Qashqadaryo viloyatining Qarshi shahrida 9-sinf o‘quvchisi o‘z joniga qasd qilgani, Bekobodda 28 yoshli ayol o‘zini 5-qavatdan tashlagani to‘g‘risida xabar berilgandi.