Тошкентда ўзини “омадсиз” деб атаб, кўприк устидан сакрамоқчи бўлган йигит жаримага тортилди (видео)

Тошкент шаҳар Чилонзор туманидаги кўприкдан ўзини ташламоқчи бўлган йигит иши бўйича маълумот берилди.

Ижтимоий тармоқларда бир йигит кўприкка чиқиб, у ерга маркер ёрдамида Лосер, яъни “омадсиз” деб ёзиб, 5 метр баландликдан ўзини ташламоқчи бўлгани тасвирланган видео тарқалди.

“Миллар” информацион дастурида маълум қилишича, мазкур воқеадан хабар топган пост-патрул хизмати ходими дарҳол воқеа жойига етиб борган ва йигит билан суҳбатлашган.

Нима сабабдан бу ерга чиқиб олганини сўраган вақтимда, фуқаро “жонимдан тўйдим”, деб айтди. Фуқаронинг қўлига қарасам қўлида ҳам “жонимдан тўйдим”, деган ёзув бор экан, — дейди ички ишлар ходими.

Шундан сўнг, бошқа ИИО ходимлари ҳам ҳам ёрдамга етиб келиб, фуқаро пастга олиб тушилган.

Жиноят ишлари бўйича Чилонзор тумани суди қарори билан ушбу фуқаро Маъмурий жавобгарлик тўғрисидаги кодекснинг 183-моддаси (майда безорилик) билан айбланиб, унга БҲМнинг 3 баравари (1 миллион 20 минг сўм) миқдорида жарима жазоси тайинланган.

Бундан олдин Қашқадарё вилоятининг Қарши шаҳрида 9-синф ўқувчиси ўз жонига қасд қилгани, Бекободда 28 ёшли аёл ўзини 5-қаватдан ташлагани тўғрисида хабар берилганди.