Россия президенти Владимир Путиннинг сўзларига кўра, Россия ва Хитой ўртасидаги муносабатлар оппортунистик эмас ҳамда ҳеч кимга қарши қаратилмаган. Бу ҳақда у ХХР раиси Си Цзиньпин билан тор доирадаги суҳбат чоғида маълум қилди.
Путин Россия ва ХХР ўртасидаги ҳамкорлик ҳозирда халқаро майдонда барқарорлаштирувчи асосий омиллардан бири эканини таъкидлаган. Унинг сўзларига кўра, Россия ва Хитой кўп қутбли воқелик ва халқаро ҳуқуққа асосланган дунё тартибини акс эттирувчи адолат тамойиллари, демократик дунё тартибини биргаликда ҳимоя қилади.
Бундан ташқари, мамлакатлар БМТ, БРИКС, ШҲТ ва G20 доирасида муваффақиятли ҳамкорлик қилмоқда. Россия ва Хитой Евросиё маконида интеграция жараёнларини янада уйғунлаштириш, ЕвроАзЭС ва “Бир камар, бир йўл” ташаббусини бирлаштириш тарафдори, — дея қўшимча қилган Россия раҳбари.
Путин Хитойга давлат ташрифи икки томонлама ҳамкорликнинг барча соҳаларини ривожлантиришга қўшимча туртки беришига умид билдирган.
Россия президенти жорий йилда ХХР ташкил топганига ва давлатлар ўртасида дипломатик муносабатлар ўрнатилганига 75 йил тўлишини таъкидлаган.
Аввалроқ Си Цзиньпин Хитой ва Россия блокларга қўшилиш, қарама-қаршилик қилмаслик ва муносабатларни бошқа давлатларга қарши йўналтирмаслик тамойилларига амал қилиш ниятида эканини айтган эди. Унинг фикрича, томонлар ўзаро сиёсий ишончни мустаҳкамлайди, танланган тараққиёт йўлини ҳурмат қилади ва умумий фаровонлик йўлида бир-бирини қўллаб-қувватлайди.
Изоҳ (0)