Ғазо секторида Исроил ҳужумлари оқибатида ҳалок бўлганлар сони 16 май куни 35 272 нафарга етган. Бу ҳақда Ғазо Соғлиқни сақлаш вазирлиги баёнотига асосланиб, Al Arabiya нашри хабар берди.
Манбада айтилишича, Ғазо секторида 7 ой давом этган жанглар яна қайтадан кучая бошлаган. Сўнгги икки ҳафта давомида ҳалок бўлганлар сони кескин ошган.
Ҳозирга қадар Ғазо секторида ҳужумлар оқибатида яраланганларнинг умумий сони 79 205 нафарга етган. Соғлиқни сақлаш тизими муассасалари вайрон этилгани боис жароҳатланганлар очиқ шароитларда ёки дала шифохоналарида даволанаётгани билдирилган.
Расмийлар 7 октябрдан то ҳозирга қадар камида 10 минг нафар ғазолик бедарак йўқолганини билдирган. Бир қатор манбалар бедарак йўқолганларнинг кўпчилиги ҳалок бўлган ёки Исроил маҳбуслар лагерларига тушиб қолган бўлиши мумкинлигини билдирган.
Исроилнинг сўнгги ҳужумлари асосан Ғазо сектори шимолидаги Жабалия ва жануби-шарқдаги Хон Юнис ҳудудларига қаратилган. Исроил ҳаво кучлари ушбу ҳудудларда асосан турар жой иншоотларини нишонга олган.
Изоҳ (0)