AQSH sobiq prezidenti Donald Trampning shaxsiy Boeing 757 samolyoti Floridadagi Uest Palm-Bich xalqaro aeroportida boshqa korporativ samolyot bilan to‘qnashib ketdi. Bu haqda manbalarga tayanib, Reuters va CNBC xabar berdi.
Ma’lum qilinishicha, hodisa 12-mayga o‘tar kechasi sodir bo‘lgan. Xususiy Boeing 757 samolyoti o‘sha kuni yerda harakatlanayotganida parkovka qilingan va yo‘lovchilari bo‘lmagan korporativ samolyotga qanoti bilan to‘qnashgan. Biroq Federal fuqarolik aviatsiyasi boshqaruvi (FAB) samolyot kimga tegishli ekaniga aniqlik kiritmagan. Holat yuzasidan FAB tergov boshlagan.
Reuters agentligining yozishicha, Donald Tramp 2010-yilda 100 million dollarga Boeing 757 samolyotini sotib olgan, u AQSH sobiq prezidenti uchun maxsus o‘zgartirilgan: ikkita dam olish xonasi, uchta hammom, ovqatlanish va konferensiya xonasi bilan jihozlangan. The Telegraph nashrining yozishicha, Trampning buyrug‘iga ko‘ra, samolyot sig‘imi 239 ta yo‘lovchi o‘rindig‘idan 43 tagacha qisqartirilgan.
Izoh (0)