Amerikaning United Airlines aviakompaniyasining Boeing 737-800 samolyoti parvoz vaqtida fyuzelyaj qobig‘ining bir qismidan ayrildi, deb xabar berdi Associated Press. Bu holat samolyot San-Fransiskodan uchib kelganidan keyin Medford xalqaro aeroportidagi tekshiruv vaqtida aniqlandi, deyiladi xabarda.
Aeroport maʼmuriyatining maʼlum qilishicha, qo‘nish xavfsiz o‘tgan va hech kim jabrlanmagan.
Aviakompaniya vakillari samolyot bortida 139 nafar yo‘lovchi va olti nafar ekipaj a’zosi bo‘lganini va parvoz vaqtida hech qanday zarar belgilari bo‘lmagani uchun favqulodda holat e’lon qilinmaganini ma’lum qildi.
Layner 25 yildan ortiq parvozda bo‘lgan. Hozirda holat yuzasidan tergov harakatlari boshlangan.
So‘nggi paytlarda Boeing samolyotlari bilan sodir bo‘ladigan hodisalar tez-tez uchramoqda. Yanvar oyi boshida Alaska Airlines aviakompaniyasining Boeing 737-9 MAX samolyoti taxminan 5 km balandlikda havoda eshigini yo‘qotib, Portlend aeroportiga favqulodda qo‘nishni amalga oshirdi. Yo‘lovchilardan hech biri jabrlanmagan.
6-mart kuni xuddi shu aviakompaniyaga qarashli Boeing 737-800 samolyoti salonidagi tutun tufayli ekipaj havoga ko‘tarilganidan ko‘p o‘tmay Portlend aeroportiga favqulodda qo‘nishni amalga oshirdi.
Izoh (0)