АҚШ собиқ президенти Дональд Трампнинг шахсий Boeing 757 самолёти Флоридадаги Уэст Палм-Бич халқаро аэропортида бошқа корпоратив самолёт билан тўқнашиб кетди. Бу ҳақда манбаларга таяниб, Reuters ва CNBC хабар берди.
Маълум қилинишича, ҳодиса 12 майга ўтар кечаси содир бўлган. Хусусий Boeing 757 самолёти ўша куни ерда ҳаракатланаётганида парковка қилинган ва йўловчилари бўлмаган корпоратив самолётга қаноти билан тўқнашган. Бироқ Федерал фуқаролик авиацияси бошқаруви (ФАБ) самолёт кимга тегишли эканига аниқлик киритмаган. Ҳолат юзасидан ФАБ тергов бошлаган.
Reuters агентлигининг ёзишича, Дональд Трамп 2010 йилда 100 миллион долларга Boeing 757 самолётини сотиб олган, у АҚШ собиқ президенти учун махсус ўзгартирилган: иккита дам олиш хонаси, учта ҳаммом, овқатланиш ва конференция хонаси билан жиҳозланган. The Telegraph нашрининг ёзишича, Трампнинг буйруғига кўра, самолёт сиғими 239 та йўловчи ўриндиғидан 43 тагача қисқартирилган.
Изоҳ (0)