Kreml AQSHning Rossiyadan uran importini taqiqlashini “adolatsiz raqobat” deb atab, global biznesni rivojlantirishda davom etishini qo‘shimcha qildi. Bu haqda The Moscow Times xabar berdi.
Xabarga ko‘ra, Rossiyaning Rosatom agentligi Vashingtonning harakatlarini kamsitish va bozorga oid bo‘lmagan qaror deb hisoblagan.
AQSH prezidenti Jo Bayden 13-may kuni Rossiyadan boyitilgan uran importini taqiqlovchi qonunni imzolagan edi.
Xabarda taqiq Moskvaning Ukrainadagi “maxsus harbiy operatsiyasi” daromadini cheklashga qaratilgani, 90 kundan keyin kuchga kirishi aytilgan.
Bu adolatsiz raqobat. Bizning atom sanoatimiz dunyodagi eng ilg‘or sohalardan biri, u nihoyatda raqobatbardosh, biz bu sohani rivojlantirishda davom etamiz, — deydi Rossiya prezidenti matbuot kotibi Dmitriy Peskov.
Ma’lumot uchun, AQSH atom elektr stansiyalari boyitilgan uranning taxminan 24 foizini Rossiyadan oladi.
Peskovning ta’kidlashicha, Amerikaliklar uchun xalqaro maydonda Rossiya bilan raqobat qilishi qiyin.
AQSHda qabul qilingan qonunni biz kamsituvchi va bozorga mos kelmaydigan qonun deb hisoblaymiz. Ko‘rinib turibdiki, siyosiy tusga ega bo‘lgan bunday qarorlar jahon yadroviy yoqilg‘i bozorining barqaror ishlashi uchun halokatlidir, — deydi Rosatom davlat korporatsiyasi.
Rosatom hisob-kitoblariga ko‘ra, 2022-yilda u 35% ulush bilan boyitilgan uran bozoridagi eng yirik ishtirokchi bo‘lgan hamda uran ishlab chiqarish va zaxiralari bo‘yicha dunyoda 2-o‘rinni egallagan.
Izoh (0)