Turkiya harbiylari 13-may kuni Iroq shimolida Kurdiston ishchi partiyasiga aloqador 3 nafar terrorchini yo‘q qilgan. Bu haqda Turkiya Milliy mudofaa vazirligi bayonotiga asoslanib, Anadolu nashri xabar berdi.
Manbada aytilishicha, jangarilar Iroq shimolidagi maxsus operatsiya zonasida yo‘q qilingan. Ushbu xabarni Turkiya Milliy mudofaa vazirligi ham, boshqa bir qancha Turkiya davlat tashkilotlari ham tasdiqlagan.
“Qahramon turk qurolli kuchlarimiz terrorizmni o‘z manbasida yo‘q qilish uchun to‘xtovsiz amaliyotlarni davom ettirmoqda. Terrorchilar obyektlarini yo‘q qilishda qatʼiyat bilan davom etamiz”, — deyiladi Turkiya Milliy mudofaa vazirligi bayonotida.
Jangarilar Qandil mintaqasida nishonga olingani xabar qilingan. Rasmiylar ularning bevosita Kurdiston ishchi partiyasiga aloqador bo‘lganini bildirgan.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)