Belgorod viloyati Borisov tumanidagi Berezovka qishlog‘ida dronlar hujumi oqibatida olti kishi halok bo‘ldi. Bu haqda viloyat rahbari Vyacheslav Gladkov xabar berdi.
Kamikadze dronlar korxonalardan birining xodimlarini olib ketayotgan “Gazel” va yengil avtomobilga hujum qilgan. Ukraina dronining zarbasi natijasida olti kishi halok bo‘lgan, 35 kishi, jumladan, ikki bola turli darajadagi og‘irlikdagi jarohatlar olgan.
Belgorod viloyati tezkor shtabi dronlar hujumiga uchragan “Gazel” “Agro-Belgorye” kompaniyasiga tegishli cho‘chqachilik fermasi xodimlarini olib ketayotganini ma’lum qildi.
Berezovka qishlog‘i Belgoroddan taxminan 50 kilometr uzoqlikda joylashgan. Ushbu aholi punkti joylashgan Borisov tumani Ukraina bilan chegaradosh.
Belgorod viloyati rasmiylari muntazam ravishda dron hujumlari haqida xabar berib keladi va bunda Ukraina harbiylarini ayblaydi. “Agro-Belgorye” Rossiyadagi eng yirik cho‘chqa go‘shti ishlab chiqaruvchi korxonalardan biridir.
Izoh (0)