Belgorodda 12-may kuni o‘n qavatli turar joy binosi qulab tushishi oqibatida halok bo‘lganlar soni 15 kishiga yetdi. Bu haqda Rossiya Favqulodda vaziyatlar vazirligiga tayanib, “RIA Novosti” xabar berdi.
Qutqaruvchilar Belgoroddagi turar-joy binosi vayronalari ostidan 17 kishini olib chiqqan, qurbonlar soni 17 tani tashkil etmoqda. Favqulodda vaziyat joyida qidiruv-qutqaruv ishlari va vayronalarni tozalash ishlari yakunlangan.
12-may kuni tushga yaqin Belgorodda ko‘p qavatli uyning bir qismi qulab tushdi. Favqulodda hodisa Shorsa ko‘chasida sodir bo‘lgan. Hodisa yuz berishidan avval Belgorodda raketa hujumidan ogohlantirish tizimi ishga tushgan. Rossiya Mudofaa vazirligi Belgoroddagi turar joy binosining bir qismi qulashiga urib tushirilgan Ukrainaning “Tochka-U” raketasining parchasi sabab bo‘lganini ma’lum qilgan. Ukraina harbiylari shahar o‘qqa tutilgani haqida hozircha ma’lumot bermagan.
Rossiya Mudofaa vazirligi tarqatgan xabarda Ukraina tomoni Belgorodni “Tochka-U” taktik raketa majmuasi, “Olxa” va RM-70 “Vampir” o‘t ochuvchi reaktiv tizimlaridan foydalangan holda o‘qqa tutgani aytiladi. Hujumni qaytarish paytida Rossiya havo hujumidan mudofaa tizimlari oltita “Tochka-U” raketasini, to‘rtta “Vampir” va ikkita “Olxa” reaktiv tizimini yo‘q qilgan. Urib tushirilgan “Tochka-U” raketalaridan birining bo‘laklari Belgorod shahridagi turar joy binosiga zarar yetkazgan.
Izoh (0)