Ukraina harbiy havo kuchlariga qarashli uchuvchisiz dronlar Rossiyaga qarashli Belgorod va Kursk viloyatlariga hujum qilishi oqibatida 5 kishi halok bo‘ldi. Bu haqda Reuters nashri xabar berdi.
Manbada aytilishicha, Ukraina Belgorod va Kursk bilan bir paytda Rossiya nazorati ostidagi Donetskka ham havo hujumi uyushtirgan. Hujumlar oqibatida jami 9 kishi jarohatlangan.
Donetskka hujumni viloyat rahbari Denis Pushilin rasman tasdiqlagan. Donetsk shahridagi restoranga dronlar zarbasi oqibatida uch nafar tinch aholi vakili halok bo‘lgan, 8 kishi jarohatlangan.
Belgorod viloyati gubernatori Vyacheslav Gladkov bayonotiga ko‘ra, Ukraina harbiy droni Novostroyevka-Pervaya aholi punktida to‘xtab turgan yuk mashinasiga zarba bergan. Hodisa oqibatida 1 kishi halok bo‘lib yana bir nafar fuqaro jarohatlangan.
Kursk viloyati rahbari Roman Starovoyt ham 11-may kuni chegaraga yaqin Sudja shahrida dronlar hujumi kuzatilganini bildirgan. Hujum oqibatida bir nafar fuqaro yaralanib, kasalxonada vafot etgan.
Rasmiylar, shuningdek, Lugansk viloyatiga ham hujum uyushtirilganini bildirgan. Rovenki shahridagi yoqilg‘i omboriga raketa hujumi sabab yirik yong‘in kelib chiqqan. Yong‘inda 4 kishi halok bo‘lgan, 11 kishi yaralangan.
Izoh (0)