Ukraina hukumati 11-may kuni mamlakat sharqidagi Xarkov viloyatidan 1700 nafardan ortiq fuqaroni evakuatsiya qildi. Bu haqda The Kyiv Independent nashri xabar berdi.
Voqea haqida dastlab Xarkov viloyati gubernatori Oleg Sinegubov xabar bergan. O‘tgan sutka davomida Xarkov viloyatidagi 1775 nafar fuqaro Rossiyaning mintaqaga yangi hujumlari munosabati bilan evakuatsiya qilingan.
Ukraina prezidenti Vladimir Zelenskiy 10-may kuni Rossiya Xarkov viloyatida yangi hujum amaliyotlarini boshlaganini bildirgan edi. Xarkov shahridan 30 kilometr shimolda joylashgan Ukraina—Rossiya chegarasida janglar boshlanib ketgani xabar qilingan.
Bosh prokuraturaga ko‘ra, Rossiya hujumlari oqibatida kun davomida hududda 3 nafar tinch aholi vakili halok bo‘lgan, 4 nafari yaralangan.
Xarkov gubernatorining ma’lum qilishicha, evakuatsiya qilinganlarning ko‘pchiligi viloyat janubi-sharqida joylashgan Chuguev tumanidan bo‘lgan. Faol otishmalar boshlangan hududdan 1048 fuqaro olib ketilgan.
Qator nashrlar rus qo‘shinlari chegaradagi to‘rtta aholi punktini egallaganini bildirgan. Xarkov maʼmuriyati bu xabarlarni rad etib, janglar davom etayotgani, hech qanday hudud yo‘qotilmaganini bildirgan.
Ukraina Qurolli Kuchlari Bosh shtabi 11-may kuni tongda Kiyev kuchlari Xarkov viloyatida ruslarning to‘qqizta yo‘nalishdagi hujumini qaytarganini xabar qilgan.
Izoh (0)