Тошкент вилоятининг Қибрай туманида компьютер тармоғи муҳандиси бахтсиз ҳодиса оқибатида ҳалок бўлди. Бу ҳақда вилоят Камбағалликни қисқартириш ва бандлик бошқармаси буйруғида маълум қилинган.
Қайд этилишича, 1 май куни соат 17:20 ларда Қибрай тумани Университет ва Салар чорраҳасидаги устунга автомобиль радарини ўрнатиш ишларига жалб қилинган 26 ёшли компьютер тармоғи муҳандиси Сардорбек Мадаминов ток уриши оқибатида вафот этган.
У 6,5 метр баландликда электр симларини улаш жараёнида ҳаво электр узатиш тармоғига тегиб кетган. Мазкур бахтсиз ҳодисани махсус текшириш учун комиссия тузилган.
Аукцион орқали радар
Тадбиркорларга 2021 йилнинг 1 мартидан бошлаб йўлларга камералар ва радарлар ўрнатишга рухсат берилган. Ер участкалари онлайн аукционлар орқали тақдим этилади.
Аукцион ғолиблари участкаларни бошқа тадбиркорларга ўтказиш ҳуқуқи билан чекланмаган муддатга олади. 2021—2022 йилларда шу тарзда 3356 та видеокамера ва 763 та радар ўрнатилган.
Маълумот учун, 2021 йил июнь ойидан бошлаб Ўзбекистондаги чорраҳа ҳамда йўлларда радар ва камера ўрнатиш жойлари аукцион орқали савдога қўйилиши бошланганди. 1 июль куни “E-auksion” сайтида биринчи бор Тошкент шаҳрида радар ўрнатиладиган жойлар аукционга чиқарилган.
Изоҳ (0)