Korrupsiyaga qarshi kurashish agentligi tomonidan 2024-yil 9-fevral kuni “Revizor” Telegram kanalida e’lon qilingan Janubiy Mirzacho‘l magistral kanali boshqarmasi qariyb 350 million so‘mga bir dona Haval Xiaolong krossoverini xarid qilgani haqidagi materialda keltirilgan holatlar yuzasidan o‘rganish o‘tkazildi. Bu haqda agentlik axborot xizmati “Daryo”ga ma’lum qildi.
BEIJING MAX CAR MCHJ XK va Janubiy Mirzacho‘l kanalidan foydalanish boshqarmasi o‘rtasida 2024-yil 9-fevral kuni davlat xaridlari elektron tizimida 349,2 million so‘mlik Haval Xiaolong yengil avtomobilini yetkazib berish yuzasidan shartnoma imzolangan.
Holat yuzasidan Korrupsiyaga qarshi kurashish agentligi Iqtisodiyot va moliya vazirligiga so‘rov yuborgan.
O‘rganish davomida Janubiy Mirzacho‘l kanalidan foydalanish boshqarmasining 2024-yil 7-martdagi 12-sonli buyrug‘iga asosan, Haval Xiaolong rusumli avtotransport vositasi boshqarma boshlig‘i Sh. Djo‘rayevga xizmat avtomashinasi sifatida biriktirilgani ma’lum bo‘lgan.
Vazirlar Mahkamasining qaroriga ko‘ra, Janubiy Mirzacho‘l kanalidan foydalanish boshqarmasi davlat organi hisoblanadi.
“Vazirlar Mahkamasining “Davlat boshqaruvi va mahalliy davlat hokimiyati organlarida xizmat avtotransport vositalaridan foydalanish tizimini tubdan takomillashtirish chora-tadbirlari to‘g‘risida”gi qarorining 1-ilovasi bilan davlat boshqaruvi va mahalliy davlat hokimiyati organlarida xizmat avtotransport vositalarini biriktirish me’yorlari belgilangan.
Mazkur me’yorlarga asosan vazirlik, davlat qo‘mitalari, qo‘mitalar va agentliklar huzuridagi davlat organlariga bazaviy hisoblash miqdorining 1500 baravari (510 million so‘m)dan oshmasligi belgilangan.
Shundan kelib chiqib, Janubiy Mirzacho‘l kanalidan foydalanish boshqarmasi tomonidan xarid qilingan avtotransport vositasi narxi kamida bazaviy hisoblash miqdorining 1027 baravariga (349,2 million 340 ming so‘m) tengligi ma’lum bo‘ldi”, — deyiladi agentlik axborotida.
Janubiy Mirzacho‘l kanalidan foydalanish boshqarmasi sotib olgan mazkur avtomobil Vazirlar Mahkamasi qarori talablariga zid hisoblanmaydi.
Izoh (0)