Korrupsiyaga qarshi kurashish agentligi 2023-yilda xizmat safarlari, xalqaro va boshqa rasmiy tadbirlar munosabati bilan xodimlari qanday sovg‘alar qabul qilgani haqida maʼlumot berdi.
Korrupsiyaga qarshi kurashish agentligi reyestridan o‘rin olgan qiymati BHMning 4 (to‘rt) baravaridan ortiq sovg‘alar agentlik balansiga kirim qilingan va ayni paytda agentlik muzeyidan joy olgan.
Unga ko‘ra, o‘tgan bir yil ichida 33 million 736 ming so‘mlik 26 ta sovg‘a agentlikka hadya qilingan. Ularni tashkilot direktori Akmal Burhonov, rahbar o‘rinbosarlari Umida To‘xtasheva, Umed Mavlonov va boshqa xodimlar qabul qilgan.
Hadyalarning aksariyati ramziy suvenir va devorga osiladigan buyumlardir. Ularning ichidan qiymati yuqori bo‘lgan sovg‘alar Qatar rasmiylari tomonidan berilgan. Xususan, 4,8 million so‘mlik Al-Zubara qalʼa shaklidagi suvenir hamda boshqa bir rangli suvenirni Qatar Korrupsiyaga qarshi kurashish va qonun ustuvorligi markazi hamda Bosh prokuraturasi bergan.
Qatarning Davlat audit byurosi sovg‘a qilgan lagan esa 2,4 million so‘mga baholangan. Mamlakatning Ma’muriy nazorat va shaffoflik idorasi bergan, Qatar hamda O‘zbekiston davlatlari bayrog‘i aks ettirilgan, metalldan yasalgan kema shaklidagi suvenir 2,5 million so‘m turadi. Ularning barchasi agentlik rahbari Akmal Burhonovga hadya qilingan.
.jpg)
Eslatib o‘tamiz, o‘tgan yili aprel oyida Korrupsiyaga qarshi kurashish agentligi xodimlari tomonidan 2023-yilga qadar xizmat safarlari, xalqaro va boshqa rasmiy tadbirlar munosabati bilan qabul qilingan sovg‘alar bo‘yicha Sovg‘alar reyestrini shakllantirilgandi.
Izoh (0)