O‘zbekistonning Buyuk Britaniyadagi elchisi Ravshan Usmanov Uorvik universiteti rektori, professor Styuart Kroft bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, muloqot chog‘ida O‘zbekiston va Britaniya taʼlim muassasalari o‘rtasida uzoq muddatli hamkorlik aloqalarini yo‘lga qo‘yish hamda ikki tomonlama manfaatli rejalar muhokama qilingan.
Hozirgi kunda ushbu universitetda 10 dan ortiq o‘zbekistonlik talabalar va ilmiy tadqiqotchilar tahsil olmoqda. Britaniya tomoni Uorvik universiteti O‘zbekiston yoshlari uchun muhandislik, axborot texnologiyalar, biznes, iqtisodiyot va marketing, huquq, xalqaro munosabatlar, jumladan, ingliz tilini mukammal darajada o‘rgatish sohalarida “El-yurt umidi” jamg‘armasi bilan ikki tomonlama aloqalarni yanada rivojlantirishdan manfaatdor ekanini ta’kidlagan.
Tomonlar Uorvik universiteti bilan O‘zbekistonning nufuzli oliy taʼlim muassasalari o‘rtasida hamkorlik parametrlarini batafsil taqdim etish maqsadida “yo‘l xarita”sini ishlab chiqish xususida fikr almashgan.
Shuningdek, “dual diploma” tizimini yo‘lga qo‘yish, tomonlarning akademik hamda ilmiy salohiyatidan kelib chiqqan holda talaba va professor-o‘qituvchilarning qisqa muddatli o‘quv kurslarini tashkil etish masalalari ko‘rib chiqildi.
Muzokaralar yakunida O‘zbekistonning muhandislik yo‘nalishlaridagi oliy taʼlim muassasalari va tadqiqot institutlari bilan hamkorlik o‘rnatish, shuningdek, respublika davlat xizmatchilari uchun nazariy va amaliy mashg‘ulotlardan iborat qisqa muddatli kurslarni tashkil etish bo‘yicha dastlabki kelishuvlarga erishildi.
Bundan oldin Buyuk Britaniyada xorijdan yuqori malakali shifokorlar va hamshiralarni ish bilan taʼminlashga ixtisoslashgan Triple West Medical rekruting kompaniyasi direktori Gurol Maxmut bilan uchrashuv o‘tkazilgan edi.
Izoh (0)