Futbol bo‘yicha Yevropa Chempionlar Ligasining yarim final javob o‘yida “PSJ” va “Borussiya D” 7-may, seshanba kuni o‘zaro to‘qnash keladi. Dastlabki o‘yin Dortmundda bo‘lib o‘tgan edi. Unda mezbonlar 1:0 hisobida g‘alaba qozongan. “Park de Prens”da o‘tkaziladigan javob uchrashuviga oid ma’lumotlar va qiziqarli faktlar taqdim etiladi.
Fransiya. Parij. “Park de Prens”
7-may, seshanba
“PSJ” –“Borussiya D” 00:00
Bosh hakam: Daniele Orsato (Italiya)
“PSJ”
Parijliklar yarim final javob o‘yinini ham xuddi chorak finaldagi “Barselona”ga qarshi bahs kabi mag‘lubiyat bilan boshlaydi. Lekin Luis Enrike shogirdlari Dortmundda raqibidan kuchsiz harakat qilmagandi. Nemislar o‘z imkoniyatidan foydalanib, 1:0 hisobidagi g‘alabani ilib ketgandi. Mbappe va uning kompaniyasi ikkinchi marta ketma-ket kambekni amalga oshirishga tayyor turibdi.
Liga 1 rahbariyati “PSJ” foydasiga chempionatdagi navbatdagi tur o‘yinini qoldirdi va ularga tayyorlanib olishga imkon yaratdi. Parijliklarda o‘yinga jismoniy jihatdan tayyor holda tushish imkoni bor.
“Borussiya”ga qarshi birinchi o‘yinda Lyuka Ernandes jarohat oldi va uzoq muddatga safdan chiqdi. Shuningdek, jarohatlanganlar ro‘yxatida Riko va Kurzava ham bor.
“Borussiya D”
“PSJ”dan farqli ravishda “Borussiya” chempionatdagi navbatdagi turni o‘tkazib yubormadi. Uikendda dortmundliklar “Augsburg”ni 5:1 hisobida mag‘lub etdi. Biroq ushbu o‘yinda Edin Terzich rotatsiya amalga oshirdi va bir necha futbolchisiga dam olish imkoniyatini yaratib berdi.
Yaqinda “Borussiya D” afsonasi Marko Roys jamoani tark etishini e’lon qildi. Endi jamoa ushbu afsonani munosib kuzatib qo‘yish uchun ham final yo‘llanmasi uchun kurashadi.
Lazaretda Bensebaini va Allerlar bor. Lekin ivuarlik futbolchi qaydnomaga kiritilishi mumkin.
O‘yin oldidan qiziqarli faktlar:
“PSJ” joriy mavsum Chempionlar Ligasidagi 5 ta uy o‘yinining barchasida gol urdi.
“Borussiya” esa 5 ta mehmondagi o‘yinning 4 tasida darvozani ishg‘ol qilgan. Faqatgina “PSJ”ga qarshi mehmondagi o‘yin (guruh bosqichida) “quruq” bo‘lgan.
Dortmundliklar YCHLning ketma-ket 3 ta mehmondagi o‘yinida gol o‘tkazib yubormoqda.
“PSJ” — “Borussiya D” o‘zaro o‘yinlar tarixiga nazar:
Ushbu mavsumda jamoalar guruh bosqichidayoq o‘zaro to‘qnash keldi. Parijda mezbonlar 2:0 hisobida g‘alaba qozongan bo‘lsa, Germaniyadagi o‘yin 1:1 hisobi bilan yakunlangan.
Yana bir qiziq jihati, hozircha o‘z tarixida yagona bo‘lib turgan Chempionlar Ligasi finaliga “PSJ” aynan dortmundliklarni mag‘lub etib, yo‘l olgandi. Birinchi o‘yinda Parij klubi 2:0 hisobida g‘alaba qozongan va javob o‘yinida 1:2 hisobida mag‘lub bo‘lgandi.
Yarim final birinchi o‘yinida esa nemis klubi 1:0 hisobida zafar quchdi.
Murabbiylarning o‘yin oldi fikrlari
YCHLdan chiqib ketsak nima qilamiz? Siz doim negativ ko‘rishga harakat qilasiz.
Hayot davom etadi. Agar shunday vaziyat ro‘y bersa, sportchilar kabi raqibni olqishlaymiz. Shundan so‘ng: “Biz qaytami va keyingi mavsum buni yana takrorlashga urinamiz” deb ayta olamiz.
Luis Enrike, “PSJ” bosh murabbiyi
“PSJ” birinchi o‘yindagidan kuchliroq o‘yin namoyish etishi aniq. Biz ham final yo‘llanmasini qo‘lga kiritmoqchimiz.
Guruh bosqichida Parijda ozroq o‘yinimizni yo‘qotganmiz. Ba’zi jabhalarda bizda jasorat yetishmagan. Dortmunddagi ikki o‘yinda esa biz raqibga qarshi qanday o‘ynay olishimizni ko‘rsatdik.
Edin Terzich, “Borussiya D” bosh murabbiyi
“PSJ” va “Borussiya D” o‘rtasidagi uchrashuv O‘zbekiston vaqti bilan 7-maydan 8-mayga o‘tar kechasi 00:00 da start oladi.
Izoh (0)