Футбол бўйича Европа Чемпионлар Лигасининг ярим финал жавоб ўйида “ПСЖ” ва “Боруссия Д” 7 май, сешанба куни ўзаро тўқнаш келади. Дастлабки ўйин Дортмундда бўлиб ўтган эди. Унда мезбонлар 1:0 ҳисобида ғалаба қозонган. “Парк де Пренс”да ўтказиладиган жавоб учрашувига оид маълумотлар ва қизиқарли фактлар тақдим этилади.
Франция. Париж. “Парк де Пренс”
7 май, сешанба
“ПСЖ” –“Боруссия Д” 00:00
Бош ҳакам: Даниэле Орсато (Италия)
“ПСЖ”
Парижликлар ярим финал жавоб ўйинини ҳам худди чорак финалдаги “Барселона”га қарши баҳс каби мағлубият билан бошлайди. Лекин Луис Энрике шогирдлари Дортмундда рақибидан кучсиз ҳаракат қилмаганди. Немислар ўз имкониятидан фойдаланиб, 1:0 ҳисобидаги ғалабани илиб кетганди. Мбаппе ва унинг компанияси иккинчи марта кетма-кет камбекни амалга оширишга тайёр турибди.
Лига 1 раҳбарияти “ПСЖ” фойдасига чемпионатдаги навбатдаги тур ўйинини қолдирди ва уларга тайёрланиб олишга имкон яратди. Парижликларда ўйинга жисмоний жиҳатдан тайёр ҳолда тушиш имкони бор.
“Боруссия”га қарши биринчи ўйинда Люка Эрнандес жароҳат олди ва узоқ муддатга сафдан чиқди. Шунингдек, жароҳатланганлар рўйхатида Рико ва Курзава ҳам бор.
“Боруссия Д”
“ПСЖ”дан фарқли равишда “Боруссия” чемпионатдаги навбатдаги турни ўтказиб юбормади. Уикэндда дортмундликлар “Аугсбург”ни 5:1 ҳисобида мағлуб этди. Бироқ ушбу ўйинда Эдин Терзич ротация амалга оширди ва бир неча футболчисига дам олиш имкониятини яратиб берди.
Яқинда “Боруссия Д” афсонаси Марко Ройс жамоани тарк этишини эълон қилди. Энди жамоа ушбу афсонани муносиб кузатиб қўйиш учун ҳам финал йўлланмаси учун курашади.
Лазаретда Бенсебаини ва Аллерлар бор. Лекин ивуарлик футболчи қайдномага киритилиши мумкин.
Ўйин олдидан қизиқарли фактлар:
“ПСЖ” жорий мавсум Чемпионлар Лигасидаги 5 та уй ўйинининг барчасида гол урди.
“Боруссия” эса 5 та меҳмондаги ўйиннинг 4 тасида дарвозани ишғол қилган. Фақатгина “ПСЖ”га қарши меҳмондаги ўйин (гуруҳ босқичида) “қуруқ” бўлган.
Дортмундликлар ЕЧЛнинг кетма-кет 3 та меҳмондаги ўйинида гол ўтказиб юбормоқда.
“ПСЖ” — “Боруссия Д” ўзаро ўйинлар тарихига назар:
Ушбу мавсумда жамоалар гуруҳ босқичидаёқ ўзаро тўқнаш келди. Парижда мезбонлар 2:0 ҳисобида ғалаба қозонган бўлса, Германиядаги ўйин 1:1 ҳисоби билан якунланган.
Яна бир қизиқ жиҳати, ҳозирча ўз тарихида ягона бўлиб турган Чемпионлар Лигаси финалига “ПСЖ” айнан дортмундликларни мағлуб этиб, йўл олганди. Биринчи ўйинда Париж клуби 2:0 ҳисобида ғалаба қозонган ва жавоб ўйинида 1:2 ҳисобида мағлуб бўлганди.
Ярим финал биринчи ўйинида эса немис клуби 1:0 ҳисобида зафар қучди.
Мураббийларнинг ўйин олди фикрлари
ЕЧЛдан чиқиб кетсак нима қиламиз? Сиз доим негатив кўришга ҳаракат қиласиз.
Ҳаёт давом этади. Агар шундай вазият рўй берса, спортчилар каби рақибни олқишлаймиз. Шундан сўнг: “Биз қайтами ва кейинги мавсум буни яна такрорлашга уринамиз” деб айта оламиз.
Луис Энрике, “ПСЖ” бош мураббийи
“ПСЖ” биринчи ўйиндагидан кучлироқ ўйин намойиш этиши аниқ. Биз ҳам финал йўлланмасини қўлга киритмоқчимиз.
Гуруҳ босқичида Парижда озроқ ўйинимизни йўқотганмиз. Баъзи жабҳаларда бизда жасорат етишмаган. Дортмунддаги икки ўйинда эса биз рақибга қарши қандай ўйнай олишимизни кўрсатдик.
Эдин Терзич, “Боруссия Д” бош мураббийи
“ПСЖ” ва “Боруссия Д” ўртасидаги учрашув Ўзбекистон вақти билан 7 майдан 8 майга ўтар кечаси 00:00 да старт олади.
Изоҳ (0)