Fransiya prezidenti Emmanuel Makron “PSJ” futbolchisi Kilian Mbappe Parij Olimpiadasida ishtirok etishiga umid qilmoqda.
“O‘tgan hafta stadionda Kilianning otasi bilan ko‘rishib qoldim (xayriya o‘yinida). Unga savol berdim. Mbappening otasi esa o‘g‘li Olimpiadada o‘ynash istagi borligini ma’lum qildi.
Barcha Yevropa klublari o‘z futbolchilariga bunday erkinlik beradi deb umid qilaman. Fransuz klublari buni amalga oshiradi, boshqa klublar ham bundan o‘rnak olsa kerak. Olimpiada shukuhi yanada yuksalishi kerak”, — deydi Makron.
Avvalroq, Mbappe “Real”ga o‘tishi, klub bilan shartnoma borasida kelishuvga erishgani xabar qilingandi. Madridliklar esa Kilianni Olimpiadaga qo‘yib yubormasligini ta’kidlagandi.
Mbappe 2018-yildan buyon parijliklar sharafini himoya qilib keladi. Futbolchining jamoa bilan bitimi 2024-yil yoziga qadar mo‘ljallangan. Joriy mavsum Kilian barcha musobaqalarda 45 ta o‘yin o‘tkazib, 43 ta gol va 10 ta golli uzatmaga mualliflik qildi.
Izoh (0)