Janubiy Koreyaning Chungchongnamdo provinsiyasida Farg‘ona savdo uyi ochilishi kutilmoqda. Bu haqda Farg‘ona viloyati hokimligi matbuot xizmati xabar berdi.
Maʼlum qilinishicha, viloyat hokimi Xayrullo Bozorov Farg‘onaga amaliy tashrif bilan kelgan Koreya Respublikasining Chungchongnamdo provinsiyasi gubernatori Kim Tae Xeum boshchiligidagi katta delegatsiyani qabul qildi.
Viloyat hokimligida o‘tgan uchrashuvda hududlararo investitsiyaviy, savdo-iqtisodiy, ijtimoiy sohalardagi to‘g‘ridan to‘g‘ri hamkorlik aloqalarini mustahkamlash va yanada kengaytirish masalalari muhokama qilindi.
Viloyat hokimi uchrashuvda hamkorlikda tashkil qilinishi ko‘zda tutilgan qator takliflarni ham bildirdi. Xususan, Chungchongnamdo provinsiyasida investitsion vakolatxona, qishloq xo‘jaligi mahsulotlari savdosi va viloyatimiz mahsulotlari ko‘rgazmasini o‘z ichiga olgan Farg‘ona savdo uyini ochish taklifi ilgari surildi.
Farg‘onadagi kichik sanoat zonalari va “Qo‘qon” EIZ imkoniyatlari haqida maʼlumot berilib, viloyatda Koreya ishlab chiqaruvchilari parki tashkil etilayotgani va ushbu texnoparkka o‘z loyihalarini joylashtirish istagida bo‘lgan Chungchongnamdo tadbirkorlariga har tomonlama ko‘mak berilishi bildirildi.
Qishloq xo‘jaligi, IT va elektrotexnika, shaharsozlik va muhandislik yo‘nalishlarida Sun Moon universitetining Farg‘ona shahridagi Koreya xalqaro universiteti bilan bir qatorda Farg‘ona davlat universiteti bilan ham hamkorligini kengaytirishi samarali bo‘lishi qayd etildi, shuningdek, Farg‘ona politexnika instituti bilan texnik yo‘nalishlarda qo‘shma loyihalarni amalga oshirish taklif qilindi.
Chungchongnamdo provinsiyasi gubernatori Kim Tae Xeum provinsiyada vakolatxona ochishda, qishloq xo‘jaligi mahsulotlari eksportini keng yo‘lga qo‘yishda ko‘mak berishga tayyor ekanliklarini maʼlum qildi.
Bundan tashqari, provinsiyada 1300 nafarga yaqin o‘zbekistonlik talabalar tahsil olishi, o‘qish uchun kelgan yoshlar ham o‘qib, ham ishlashlari uchun imkoniyatlar mavjudligi haqida aytildi. Farg‘onadagi oliy o‘quv yurtlaridagi namunali o‘qigan talabalarga grantlar ajratish ham maʼlum qilindi. Taʼlim, madaniyat va sanʼat yo‘nalishlarida alohida hamkorlikni yo‘lga qo‘yish bo‘yicha ham rejalar belgilab olindi.
Bildirilgan takliflar asosida ikki tomonlama “yo‘l xaritasi” ishlab chiqishga va kelishuvlarni amalga oshirish bo‘yicha hamkorlikda ish tashkil qilishga kelishib olindi.
Uchrashuvda shuningdek, Farg‘ona viloyati va Chungchongnamdo provinsiyasi o‘rtasida do‘stlik va hamkorlik to‘g‘risidagi anglashuv memorandumi ham imzolandi.
Izoh (0)